АНУ-ын нийгмийн даатгалын тэтгэмж ирэх онд 3.6 хувиар нэмэгдэх төлөвтэй байна

АНУ-ын Нийгмийн даатгалын захиргаа ирэх оны нийгмийн даатгалын тэтгэмжийн амьжиргааны зардлын нэмэгдэл буюу COLA-г аравдугаар сарын 14-нд зарлахаар товложээ. Ахмад настнуудын эрх ашгийг хамгаалах байгууллагуудын урьдчилсан тооцоогоор тэтгэмж 3.5-аас 3.6 хувиар нэмэгдэх төлөвтэй байгаа нь ирэх оны 2.8 хувийн өсөлтөөс өндөр үзүүлэлт юм.

COLA нь инфляцтай уялдуулан нийгмийн даатгалын тэтгэмжийг жил бүр нэмэгдүүлэх механизм юм. Нэмэгдлийн хэмжээг АНУ-ын хот суурин газрын ажилчид болон албан хаагчдын хэрэглээний үнийн индексийн гуравдугаар улирлын өөрчлөлтөд үндэслэн тогтоодог.

Ахмад настнуудын эрх ашгийг хамгаалах “The Senior Citizens League” байгууллага есдүгээр сарын 11-нд нийтэлсэн тооцоондоо ирэх оны нэмэгдлийг 3.5 хувь гэж таамаглажээ. Харин AARP мөн хугацаанд 3.6 хувийн өсөлт хүлээж байгаагаа мэдээлсэн байна.

Сарын дундаж тэтгэмж $68-оор нэмэгдэх боломжтой “The Senior Citizens League”-ийн тооцоогоор COLA 3.5 хувиар тогтвол сарын дундаж тэтгэмж 1,940.08 ам.доллароос 2,007.98 ам.доллар болж, 67.90 ам.доллароор нэмэгдэхээр байна. Гэхдээ уг тооцоо нь тус байгууллагын ашигласан тэтгэмжийн дундаж хэмжээнд суурилсан бөгөөд бүх тэтгэвэр авагч ижил хэмжээний нэмэгдэл авна гэсэн үг биш юм. Харин AARP-ийн 3.6 хувийн өсөлтийн таамаглалд үндэслэвэл тэтгэвэр авагчдын сарын дундаж тэтгэмж ойролцоогоор 75 ам.доллароор нэмэгдэх боломжтой гэж үзжээ. Ийнхүү хоёр байгууллагын тооцоо ойролцоо байгаа ч албан ёсны нэмэгдлийн хэмжээ инфляцын эцсийн мэдээллээс хамаарна.

Эрүүл мэндийн даатгалын шимтгэл нэмэгдэх төлөвтэй байна Тэтгэмжийн нэмэгдэл ахмад настнуудын худалдан авах чадварыг хэр хэмжээгээр дэмжих нь эрүүл мэндийн даатгал болон амьжиргааны бусад зардлын өөрчлөлтөөс хамаарна. АНУ-ын “Medicare” хөтөлбөрийн “Part B” буюу эмчийн үзлэг, амбулаторийн тусламж зэрэг үйлчилгээг хамардаг даатгалын сарын шимтгэл энэ онд 202.90 ам.доллар байхаар тусгажээ. Харин “Medicare”-ийн энэ оны санхүүгийн тайланд 2027 оны нийгмийн даатгалын шимтгэлийг 209.50 ам.доллар байхаар урьдчилан тооцоолжээ. Уг төсөөлөл хэрэгжвэл шимтгэл сард 6.60 ам.доллароор нэмэгдэх юм. Гэхдээ 2027 онд олгох эцсийн шимтгэлийн хэмжээ хараахан батлагдаагүй байна. Нийгмийн даатгалын тэтгэмжээс “Medicare Part B”-ийн шимтгэлээ төлдөг иргэдийн хувьд даатгалын зардлын өсөлт нь тэтгэмжийн нэмэгдлээс гар дээр үлдэх мөнгөн дүнг бууруулах боломжтой. Үүнтэй зэрэгцэн АНУ-ын “Medicare” хөтөлбөрийг хариуцдаг CMS байгууллага шаардлага хангасан “B” хэсгийн даатгуулагчдад аравдугаар сард нэг удаагийн 90 ам.долларыг буцаан олгохоор мэдээлжээ. Уг төлбөр нь даатгалын шимтгэлийн зардлыг бууруулах зорилготой бөгөөд зөвхөн тодорхой шалгуур хангасан иргэдэд хамаарна. Ийнхүү АНУ-ын нийгмийн даатгалын тэтгэмж ирэх онд өмнөх жилийнхээс өндөр хувиар нэмэгдэх төлөвтэй байгаа ч ахмад настнуудын худалдан авах чадварт үзүүлэх бодит нөлөө нь инфляц болон эрүүл мэндийн даатгалын зардлын өөрчлөлтөөс хамаарахаар байна.