Azzuro Resources Kerry Mining группээс 3.06 сая австрали долларын стратегийн хөрөнгө оруулалт татлаа

Azzuro Resources PLC (ASX: AZ9) Hong Kong-д бүртгэлтэй, Kerry Mining группийн гишүүн Kerry Resources Logistics (Hong Kong) Limited компанитай хувьцаа захиалгын гэрээ байгуулж, 3,058,125 австрали доллар (зардал хасахаас өмнө) татан төвлөрүүлэхээ 2026 оны 10 дугаар сарын 14-нд Австралийн хөрөнгийн бирж (ASX)-д мэдэгдлээ. Гэрээг 10 дугаар сарын 13-нд байгуулсан байна.

Гэрээний дагуу хөрөнгө оруулагч 203,875,000 ширхэг CHESS депозитарын эрх (CDI)-ийг нэгжийг нь 0.015 австрали доллараар худалдан авна. Нэг CDI нь компанийн нэг энгийн хувьцааны өмчлөлийн эрхийг илэрхийлнэ. Энэ үнэ 10 дугаар сарын 13-ны хаалтын үнэ болох 0.014 австрали доллараас 7 хувиар, 15 өдрийн жигнэсэн дундаж үнэ (VWAP) 0.0136 австрали доллараас 10 хувиар өндөр юм.

Гүйлгээ хийгдсэний дараа хөрөнгө оруулагч компанийн нийт хувьцааны ойролцоогоор 19.9 хувийг эзэмшиж, томоохон хувьцаа эзэмшигч болно. Энэ нь одоогийн 820,670,388 хувьцаа болон шинэ хувьцаа гаргасны дараах 1,024,545,388 хувьцаанд үндэслэсэн тооцоо юм. Шинэ CDI-ууд ASX-ийн бүртгэлийн журмын 7.1 болон 7.1A заалтаар олгогдсон одоогийн хувьцаа гаргах эрхийн хүрээнд гаргагдах тул хувьцаа эзэмшигчдийн зөвшөөрөл шаардлагагүй. Гэрээ урьдчилсан нөхцөлгүй бөгөөд гүйлгээг 2026 оны 10 дугаар сарын 19-нд дуусгахаар төлөвлөжээ.

Хөрөнгө оруулагч компанид 15-аас доошгүй хувийн ашиг сонирхол эзэмшиж байх хугацаанд ТУЗ-д нэг гишүүн нэр дэвшүүлэх эрхтэй боловч одоогоор нэр дэвшүүлэхгүй гэдгээ мэдэгдсэн байна. Мөн тохиролцсон тохиолдлоос бусад үед хоёр жилийн хугацаанд эзэмшлээ 19.9 хувиас хэтрүүлэхгүй байх үүрэг хүлээжээ. Татсан хөрөнгийг компанийн Монгол дахь тусгай зөвшөөрөлтэй талбайн хайгуул, үнэлгээ болон эргэлтийн хөрөнгөд зарцуулна.

Azzuro-ийн гүйцэтгэх захирал Ган-Очир Зундуйсүрэн энэхүү хөрөнгө оруулалтыг компанийн хувьд “компанийг эрс өөрчлөх алхам” гэж тодорхойлоод, гурван сая австрали долларын санхүүжилт нь Ред Хилл төслийн нөөц тогтоох ажил, металлургийн туршилт болон анхан шатны арилжааны судалгааг бүрэн санхүүжүүлнэ гэж мэдэгджээ. Тэрээр Kerry баруун Монголд орон нутагт суурилсан техникийн болон үйл ажиллагааны туршлагатай гэдгийг онцолсон байна. Хөрөнгө оруулагчийн эрх бүхий төлөөлөгч Tiffany Nip компанийн Овал дахь илрэл болон Ред Хиллийн зэс-алтны системийн чанарыг өндрөөр үнэлж, нөөц тогтоох ажил болон техникийн судалгааг дэмжинэ гэжээ.

Мэдэгдэлд дурдсанаар Kerry Mining групп нь 1974 онд Robert Kuok үүсгэн байгуулсан Hong Kong-ийн Kerry Group-ийн гишүүн бөгөөд тус групп Hong Kong-ийн хөрөнгийн биржид бүртгэлтэй Kerry Properties Limited (683), Shangri-La Asia Limited (69) зэрэг компанийг эзэмшдэг. Kerry Mining 2000-аад оны дунд, сүүл үеэс Монголд байгалийн баялгийн хайгуул, олборлолт эрхэлж, Завхан аймгийн Баян Айраг алт-зэсийн төслийг хөгжүүлсэн. Компанийн танилцуулсан газрын зураг дээр Баян Айраг нь Говь-Алтай аймгийн нутагт орших Овал, Ред Хилл төслүүдээс 160 орчим километрийн зайд байрладаг.

Azzuro нь өнгөрсөн 10 дугаар сарын 1-нд Ред Хилл төсөлд зэсийн сульфидын шинэ бүс илрүүлснээ мэдэгдсэн бөгөөд тус төслийн шинжилгээний хариу болон металлургийн туршилтын үр дүнг хүлээж байгаа юм.

Эх сурвалж: Azzuro Resources PLC-ийн ASX-д нийтэлсэн “Azzuro Secures A$3.06 Million Strategic Investment” мэдэгдэл (2026 оны 10 дугаар сарын 14) болон дагалдах Appendix 3B. Нүүр зураг: тус мэдэгдлийн 1 дүгээр зураг (газрын зургийн эх сурвалж: Аж үйлдвэр, эрдэс баялгийн яам).