“Barington Capital” компани Bath & Body Works-ийг худалдах боломжийг удирдлагад нь санал болгожээ

Идэвхтэй хөрөнгө оруулалтын “Barington Capital Group” АНУ-ын хувийн арчилгаа, үнэртэн бүтээгдэхүүний “Bath & Body Works” компанид шинээр хувь эзэмшиж, компанийг худалдах боломжийг судлахыг удирдлагад нь шаардаж байгаа талаар “Bloomberg News” пүрэв гарагт эх сурвалжуудаас эш татан мэдээллээ.

Мэдээлэл гарсны дараа Охайо мужийн Колумбус хотод төвтэй “Bath & Body Works”-ийн хувьцааны ханш өргөтгөсөн арилжаагаар 2 орчим хувиар нэмэгдэв. Гэсэн хэдий ч компанийн хувьцааны ханш он гарснаас хойш 13 орчим хувиар сулраад байна.

“Barington Capital”-ийн гүйцэтгэх захирал Жеймс Митаротонда “Bath & Body Works”-ийг зах зээл дээр бодит үнэлгээнээсээ доогуур үнэлэгдэж байгаа гэж үзэж, боломжит худалдан авагч хайх зөвлөхүүдийг ажиллуулах хэрэгтэй гэж мэдэгджээ. Түүний үзэж буйгаар сүүлийн жилүүдэд удирдлага тогтворгүй байсан нь компанийн үйл ажиллагаанд сөргөөр нөлөөлсөн байна.

"Reuters" агентлагийн мэдээлснээр Митаротонда компанид “өөрчлөлт хэрэгтэй” гэдгийг онцолжээ. Мөн тэрбээр “Bath & Body Works”-ийн зах зээл дэх байр суурь, брэндийн танигдсан байдал болон мөнгөн урсгал бий болгох чадвар нь боломжит худалдан авагчид, тэр дундаа хувийн хөрөнгө оруулалтын сангуудын сонирхлыг татах боломжтой гэж үзэж байна.

“LSEG”-ийн зургадугаар сарын 30-ны мэдээллээр “Barington Capital” тус компанийн 780,000 орчим хувьцаа буюу 0.38 хувийг эзэмшиж байжээ. Мөн хөрөнгө оруулалтын компани орлогоо нэмэгдүүлэхийн зэрэгцээ хувьцаагаа эргүүлэн худалдан авах замаар хувьцаа эзэмшигчдийн өгөөжийг сайжруулахыг “Bath & Body Works”-оос шаардаж байгаа аж. “Barington Capital” ирэх долоо хоногуудад ТУЗ-д нээлттэй захидал хүргүүлж, өөрийн төлөөллийг оруулахаар зорьж байна.

“Bath & Body Works” хэрэглэгчдийн зарцуулалт сул байгаа үед бизнесээ сэргээхээр ажиллаж буй. Өнгөрсөн онд гүйцэтгэх захирлын албан тушаалыг хүлээн авсан Даниел Хиф бүтээгдэхүүний шинэчлэл болон дижитал платформыг сайжруулахад голлон анхаарч байгаа юм.

Наймдугаар сард тус компани дэлгүүрүүд болон худалдааны төвүүдээр үйлчлүүлэх хүний тоо буурсантай холбоотойгоор тухайн улирлын борлуулалт шинжээчдийн төсөөлж байснаас илүү хэмжээгээр агших төлөвтэйг мэдээлсэн. Хиф “Reuters”-т өгсөн ярилцлагадаа бизнесийг сэргээх ажлууд эхний шатандаа ахицтай байгаа ч компанийн үйл ажиллагаанд тулгарч буй хүндрэлүүдийг хараахан бүрэн нөхөж чадаагүй гэж тайлбарлаж байв.

Харин Митаротонда сүүлийн таван жилийн хугацаанд удирдлага олон удаа солигдсон нь борлуулалт болон брэндийн байр суурийг сулруулсан гэж шүүмжилжээ.

“Barington Capital” урьд өмнө “Bath & Body Works”-тэй холбоотой компаниудад мөн өөрчлөлт шаардаж байсан туршлагатай. Өнгөрсөн онд тус хөрөнгө оруулагч дотуур хувцасны “Victoria’s Secret” компанийг ТУЗ-ийн бүтцээ шинэчилж, компанийг хүсээгүй худалдан авалтаас хамгаалах “poison pill” механизмаа зогсоохыг шаардсан юм. Үүнээс өмнө “Victoria’s Secret” болон “Bath & Body Works”-ийн хуучин толгой компани “L Brands”-д өөрчлөлт хийхийг шаардаж байсан бөгөөд хоёр бизнес хожим тусдаа компани болсон билээ.