Энди Бёрнхэм: “RAF Fairford”-ийн хэрэгт Иран оролцсон байж болзошгүй

Их Британийн Ерөнхий сайд Энди Бёрнхэм “RAF Fairford” агаарын цэргийн баазын ойролцоо өнгөрсөн ням гарагт болсон аюулгүй байдлын хэрэгт Иран оролцсон байж болзошгүйг мэдэгдлээ.

“Өнгөрсөн амралтын өдрүүдэд ‘RAF Fairford’-т болсон үйл явдалд Иран оролцсон гэх хүчтэй шинж тэмдэг бий” гэж Бёрнхэм лхагва гарагт “BBC”-д ярьжээ. Гэхдээ тэрбээр уг дүгнэлтийг нотлох дэлгэрэнгүй мэдээлэл өгөөгүй бөгөөд цагдаагийн мөрдөн шалгах ажиллагаа үргэлжилж байгааг онцолсон.

Ираны Гадаад хэргийн сайд Аббас Арагчи Бёрнхэмийн мэдэгдлийг няцааж, Их Британийн тал буруу чиглэлд сэжиглэж байна гэсэн утгатай байр суурь илэрхийлэв. Үүнээс өмнө Лондон дахь Ираны Элчин сайдын яам ч Тегераныг хэрэгтэй холбосон таамгийг үндэслэлгүй хэмээн няцаасан юм.

Таван сэжигтнийг батлан даалтад гаргажээ

Английн Глостершир дэх “RAF Fairford” баазын ойролцоо есдүгээр сарын 27-ны үүрээр гурван сэжигтэй тээврийн хэрэгсэл илэрсний дараа цагдаа нар 23-25 насны таван эрэгтэйг баривчилжээ. Тэд бүгд Их Британийн иргэн бөгөөд терроризмд бэлтгэсэн болон тэсрэх бодистой холбоотой хэрэгт сэжиглэгдсэн байна.

Цагдаа нар автомашинуудад хийсэн нэгжлэгээр тодорхой хэмжээний бензин илрүүлсэн ч тэсрэх төхөөрөмж олоогүй гэж “BBC” мэдээлэв. Сэжигтнүүдийг мөрдөн шалгах ажиллагааны хүрээнд батлан даалтад гаргасан бөгөөд Бёрнхэм тэдэнд хатуу нөхцөл тавьсан гэж тайлбарлажээ. Таван сэжигтний нэг нь цагдаагийн 999 дугаарт өөрөө дуудлага өгсөн нь мөн мөрдөн шалгах ажиллагааны нэг хэсэг болж байна.

“RAF Fairford” нь Их Британийн нутаг дэвсгэрт байрладаг ч АНУ-ын Агаарын цэргийн хүчин олон жилийн турш ажиллагааны түшиц цэг болгон ашиглаж ирсэн. Сүүлийн саруудад АНУ-ын бөмбөгдөгч онгоцууд тус баазаас Ойрх Дорнод руу ниссэн бөгөөд Их Британи Ираны эсрэг тодорхой “хамгаалалтын цохилтод” баазыг ашиглах зөвшөөрөл Вашингтонд олгосон байна.

АНУ-ын Төрийн нарийн бичгийн дарга Марко Рубио даваа гарагт “Fox News”-т ярилцлага өгөхдөө “RAF Fairford”-ийн хэрэгт гадаадын хүчин оролцсон нь тодорхой гэж мэдэгдсэн ч мөн нотлох баримтаа нийтэд дэлгээгүй. Их Британи, АНУ-ын аюулгүй байдлын байгууллагууд мөрдөн шалгах ажиллагааны хүрээнд хамтран ажиллаж байгааг Бёрнхэм хэлжээ.

АНУ Ираны төлөөлөгчдийг Нью-Йоркоос гарахыг шаарджээ

“RAF Fairford”-ийн хэрэгтэй зэрэгцэн Вашингтон, Тегераны дипломат харилцаанд шинэ зөрчил үүсэв. АНУ-ын Төрийн нарийн бичгийн дарга Марко Рубио НҮБ-ын Ерөнхий Ассамблейд оролцсон Ираны Гадаад хэргийн сайд Аббас Арагчи тэргүүтэй төлөөлөгчдийг Нью-Йоркоос төлөвлөснөөс нь эрт гарахыг шаардсан гэж АНУ-ын албан тушаалтнууд мэдээлжээ.

Арагчи Нью-Йоркт үлдэж, Ормузын хоолойг нээх, Ираны цөмийн хөтөлбөрийн хэлэлцээг сэргээх болон хоёр улсын зөрчлийг намжаах асуудлаар зуучлагчаар дамжуулан АНУ-тай хэлэлцэж байсан ч яриа хэлэлцээ бодит ахицад хүрээгүй байна.

АНУ-ын албан тушаалтан Ираны төлөөлөгчид НҮБ-ын Ерөнхий Ассамблей өндөрлөсний дараа хэт удаан үлдсэн гэж тайлбарласан бол Ираны тал төлөөлөгчдийн буцах хугацааг өмнө нь АНУ-ын Төрийн департаментад мэдэгдсэн хэмээн маргажээ.