Хүүхдийн эрүүл мэндийн эрт илрүүлэг сургууль, цэцэрлэгт үргэлжилж байна

Аравдугаар сарын 1-нээс арванхоёрдугаар сарын 1-ний хооронд сургууль, цэцэрлэгт суурилсан хүүхдийн эрүүл мэндийн эрт илрүүлгийг зохион байгуулж байна. Үзлэгт цэцэрлэгийн гурван настай хүүхэд болон нэгдүгээр, зургаадугаар, есдүгээр, арванхоёрдугаар ангийн сурагчдыг хамруулж байгаа юм. Ийнхүү насны онцлогт нь тохируулан хүүхдийн эрүүл мэндийн эрсдэлийг тогтоох зорилготой үзлэгийг Боловсролын яам, Эрүүл мэндийн яам хамтран хэрэгжүүлж байна.

Аяны хүрээнд нийт 291,998 хүүхдийг хамруулахаар төлөвлөснөөс 118,090 нь үзлэгт оржээ. Ингэснээр хэрэгжилтийн явц 40.4 хувьтай байна. Үзлэгийг сонгосон насны бүлэг болон ангийн сурагчдад зохион байгуулж, хүүхдийн эрүүл мэндийн байдлыг нэг бүрчлэн үнэлж байгаа юм.

Үзлэгийн хүрээнд хүүхдийн эрүүл мэндийн байдлыг А, B, C, D гэсэн дөрвөн түвшнээр үнэлж байна. Эдгээр нь эрт илрүүлгийн үеийн үнэлгээний ангилал бөгөөд хүүхдийн эрүүл мэндийн эрсдэлийг тодорхойлох, цаашдын хяналт болон шаардлагатай тусламжийг төлөвлөхөд ашиглагдана.

Ялангуяа C болон D үнэлгээтэй хүүхдүүдийг холбогдох эмнэлэгт үзүүлж, шаардлагатай тусламж авахыг зөвлөжээ. Одоогийн үзлэгийн дүнгээр C үнэлгээтэй хүүхдүүдийн дийлэнхэд амны хөндийн өвчлөл илэрсэн байна. Тиймээс эдгээр хүүхдийг цаашдын хяналт, эмнэлгийн үзлэгт хамруулахад анхаарах шаардлагатай гэж үзжээ.