Intel, Broadcom-ийн гүйцэтгэх захирлууд хиймэл оюуны өсөлтийг санхүүжилтийн хомсдол саатуулж магадгүйг анхааруулав

Сингапурт болсон DBS Asia Future Forward Conference-ийн үеэр Intel, Broadcom-ийн гүйцэтгэх захирлууд хиймэл оюуны өсөлт ойрын жилүүдэд эрэлтээсээ илүү санхүүжилтийн боломждоо “түгжигдэх” эрсдэлтэйг анхаарууллаа. Тэдний гол санаа нь шинэ дата төв, чип, тооцооллын дэд бүтцийг богино хугацаанд асар хурдтай тэлэх шаардлага гарч байгаа ч энэ бүхнийг санхүүжүүлэх капиталын хүртээмж хамгийн том саад болж магадгүй гэсэн байр суурь байв. Broadcom-ийн гүйцэтгэх захирал Хок Тан “Хамгийн том хязгаарлалт нь капитал байж мэднэ” гэж хэлсэн бол Intel-ийн гүйцэтгэх захирал Лип-Бу Тан капиталын өртөг өсөж байгааг онцолсон юм.

Удирдлагуудын ярианаас үзвэл AI-ийн өсөлт зөвхөн техник хангамжийн нийлүүлэлтийн мөчлөгөөр хэмжигдэхээ больж, хөрөнгө мөнгөний өртөг, санхүүжилтийн нөхцөлтэй илүү шууд уялдах болжээ. Хок Тан санхүүжилтийн дарамт нь хагас дамжуулагч, санах ой, цахилгааны хомсдолоос ч том саад болж мэднэ гэж тэмдэглэсэн байна. Харин Лип-Бу Тан “Ойрын сорилт гэвэл капитал, капиталын өртөг, харин урт хугацаанд хүмүүс ROI-ийг харахыг хүснэ” гэж, хөрөнгө оруулагчдын хүлээлт чангарч байгааг илэрхийлэв. Ийм нөхцөлд бизнесүүд хөрөнгө оруулалтаа зөвтгөхөд илүү тодорхой өгөөж, илүү ойлгомжтой хэрэглээний кейс шаардагдах төлөвтэй.

Нөгөө талд, нийлүүлэлтийн талын зарим “саад” цаг хугацааны явцад амьсгаа авах боломжтойг Broadcom хэллээ. Хок Тан үйлдвэрлэлийн хүчин чадал тэлэхийн хэрээр зарим хомсдол аажмаар суларч, ваферын нийлүүлэлт 2028-2029 он гэхэд сайжирч магадгүй гэж үзэв. Түүнчлэн тэрээр “Өнөөдрийн санах ойн хомсдол жилийн дараа өөр байж магадгүй” хэмээн, одоогийн тэнцвэргүй байдал тогтмол үргэлжилнэ гэж үзэхэд эрт байгааг санууллаа. Гэвч ийм сайжрал гарлаа ч гэлээ, тооцооллын хэрэгцээ өргөн хүрээнд өсөж байгаа нь нийлүүлэлтийн дарамтыг бүрэн сулруулахгүй гэсэн өнгө аяс давхар сонсогдсон юм.

Эрэлт дээрх зураг илүү тод харагдав. Хок Тан “Бидний нийлүүлж чадахаас илүү тооцооллын дэд бүтцийн эрэлт байна” гэж, одоогийн зах зээлд захиалга, хэрэгцээ нийлүүлэлтээсээ давж байгааг шууд тодорхойлов. Тэр мөн энэ зөрүү 2029-2030 он хүртэл үргэлжилж магадгүй гэж хэлснээрээ, хиймэл оюуны “тооцооллын дайн” урт хугацааны цикл болох магадлалыг хөндсөн байна. Өөрөөр хэлбэл, чип, санах ой, серверийн хүчин чадлыг нэмэх нь дан ганц техник төдийгүй, санхүүжилтийн тэсвэр тэвчээр шаардах урт гүйлт болж байна.

Удирдлагууд ойрын 2-3 жилд AI тооцооллын дэд бүтцийн эрэлт хүчтэй хадгалагдана гэж үзсэн ч, цаашдын өсөлт нь бизнесүүдийн бодит хэрэглээ, эдийн засгийн үр ашигтай уялдана гэж сануулав. Капиталын өртөг өсөхийн хэрээр дата төв, чипийн хөрөнгө оруулалтын эдийн засаг шахагдаж, илүү өндөр босготой тооцоолол шаардах төлөвтэй гэсэн дохио эндээс гарна. Хок Тан “Сүүлийн хоёр жилд саад тасралтгүй гарсан ч, бид давж ирсэн” гэж хэлсэн нь салбарын тэсвэрийг илтгэх ч, дараагийн үе шатанд зах зээл ROI-ийн хатуу шалгуураар “шүүлт” хийхийг Лип-Бу Тан давхар санууллаа. Эцсийн дүнд AI-ийн дараагийн давлагаа зөвхөн технологийн боломж бус, санхүүжилтийн нөхцөл, бодит хэрэглээний ашигтай нийлж байж л тэлнэ гэсэн мессеж Сингапурын тайзан дээрээс тод сонсогдов.