Ли Ин Гын: Улаанбаатарт барилга барихаас өмнө замаа төлөвлөх хэрэгтэй

Нийслэлийн замын сүлжээ сийрэг учраас шинэ барилга барихаас өмнө замын асуудлыг шийдэх хэрэгтэйг Сөүлийн их сургуулийн профессор Ли Ин Гын онцоллоо. Тэрбээр өнөөдөр "Чингис хаан" үндэсний музейд болж буй Монгол-БНСУ-ын хот төлөвлөгч, инженерүүдийн хамтарсан “Хот төлөвлөлтийн III форум”-д Сөүлийн хөгжлийн туршлагаас танилцуулах үеэрээ ингэж хэлжээ.

“Зам байхгүй газар барилга барихаас зайлсхийх хэрэгтэй. Барилга барихын тулд эхлээд замаа барих нь зүйтэй”...Түүний тайлбарласнаар нийслэл замын хүртээмжээ нэмэгдүүлж, нийтийн тээврээ хөгжүүлснээр иргэдийн амьдрах орчныг сайжруулах боломжтой гэж үзэж байгаа юм.

Хүн амын өсөлт төлөвлөлтөөс давсан нь

Ли Ин Гыний танилцуулснаар Сөүл хот 1965 онд ерөнхий төлөвлөгөөгөө боловсруулахдаа таван сая хүн амтай байхаар тооцоолж байжээ. Гэвч хөдөөнөөс хот руу шилжих хөдөлгөөн нэмэгдэж, 1990-ээд оны эхээр хүн ам нь 10 саяд хүрсэн байна.

Хүн амын хурдацтай өсөлтийг дагаад дэд бүтэц, зам тээвэр, байгаль орчны асуудлууд тулгарч эхлэв. Сөүл эдгээрийг шийдвэрлэхдээ төрийн бодлого, төлөвлөлтийг иргэдийн оролцоотой хослуулсан аж.

Хотыг анхнаас нь төгс төлөвлөж, бүрэн бүтээх боломжгүй бөгөөд дутагдалтай хэсгээ үе шаттай засч сайжруулах замаар хөгжүүлдэг гэдгийг тэрбээр мөн онцоллоо.

Нийтийн тээвэр, халаалтын шинэчлэл

Сөүл хот нийтийн тээврийн хүртээмжийг нэмэгдүүлэхийн тулд 1970-аад оноос метро байгуулж эхэлсэн талаар Ли Ин Гын дурдав. Нийтийн тээврийг тогтмол хөгжүүлснээр иргэд хувийн автомашин жолоодохгүйгээр зорчих боломж бүрдсэн гэж тэрбээр тайлбарласан юм.

Мөн Сөүл агаарын бохирдлын асуудалтай ч тулгарч байсан бөгөөд 1980-аад оны эхээр өрхийн нүүрсний хэрэглээг хийн түлшээр орлуулж эхэлжээ.

Улаанбаатарын хувьд замын хүрэлцээг нэмэгдүүлэхийг нэн тэргүүний асуудал гэж профессор үзэж байна. Үүний зэрэгцээ нийтийн тээврийг төлөвлөж, хөгжүүлэх нь хотыг иргэдэд илүү тохиромжтой амьдрах орчин болгоход чухал гэдгийг онцлов.