Нийслэл хотын хоёр хувийн албан татварыг бууруулах санал НИТХ-д өргөн барина

Нийслэл хотын албан татварын одоогийн хоёр хувийн хувь хэмжээг бууруулах тогтоолын төслийг Нийслэлийн Иргэдийн Төлөөлөгчдийн Хуралд өргөн барьж, хэлэлцүүлэхээр болсныг НИТХ-ын дарга Д.Ихбаяр, нийслэлийн Засаг дарга бөгөөд Улаанбаатар хотын Захирагч Б.Пүрэвдагва нар зарлалаа.

Нийслэл 2026 оныг “Бизнес эрхлэгчдийг дэмжих жил” болгон зарласан бөгөөд уг бодлогын хүрээнд нийслэлийн удирдлагууд зочлох үйлчилгээ, аялал жуулчлал, хоол үйлдвэрлэлийн салбарын төлөөлөлтэй уулзах үеэр татвар бууруулах саналаа танилцуулжээ.

Нийслэл хотын албан татварыг хуульд заасан бараа, үйлчилгээг худалдан авч буй хэрэглэгч төлдөг бөгөөд борлуулагч тухайн татварыг суутган төсөвт төвлөрүүлдэг. Тиймээс хувь хэмжээг бууруулбал хэрэглэгчийн эцсийн төлбөрт ногдох татварын хэмжээ багасна. Нийслэлийн удирдлагууд уг өөрчлөлтийг өрхийн хэрэглээг дэмжихийн зэрэгцээ бизнес эрхлэгчдийн борлуулалтын орчныг сайжруулах арга хэмжээ хэмээн тайлбарлав.

Бизнесийн орчныг сайжруулах хүрээнд нийслэл өмнө нь “Чөлөөлье” санаачилгыг хэрэгжүүлж, зөвшөөрлийн шинжтэй 103 төрлийн бүртгэлээс бизнес эрхлэгчдийг чөлөөлсөн байна.

Мөн хувийн хэвшил хэрэгжүүлэх боломжтой бизнес, үйлчилгээг төр өөрөө эрхлэхгүй байх зарчим баримталж, төр, хувийн хэвшлийн түншлэлийг өргөжүүлэхэд анхаарна гэдгээ нийслэлийн удирдлагууд мэдэгдлээ.

Нийслэл хотын албан татварын хувь хэмжээг хэд болгон бууруулах санал гаргаж байгаа болон өөрчлөлт хэзээнээс хэрэгжих нь НИТХ-ын хэлэлцүүлэг, шийдвэрээс хамаарах ажээ.