Нийслэлийн гурван байршлын халаалтын зуухыг хийн системд шилжүүлж байна

Нийслэлийн агаарын бохирдлыг бууруулах ажлын хүрээнд Дамбадаржаа, Чингэлтэй дэд төв болон ерөнхий боловсролын 149 дүгээр сургуулийн халаалтын зуухыг хийн системд шилжүүлэх ажил дуусах шатандаа оржээ.

Агаарын бохирдлыг бууруулах Үндэсний хорооны Ажлын алба хувийн хэвшлийн байгууллагуудтай хамтран 100 кВт-аас дээш хүчин чадалтай халаалтын зуухнуудыг шинэчилж байна. Төслийг Аж ахуйн нэгжийн орлогын албан татварын тухай хуулийн хүрээнд “Саусгоби Сэндс” ХХК-ийн татвар ногдох орлогын нэг хувьтай тэнцэх санхүүжилтээр хэрэгжүүлж байгаа аж.

Дамбадаржаа дэд төвд хийн нөөцийн сав байрлуулан, бойлер суурилуулж, системийн холболтыг үргэлжлүүлж байна. Харин ерөнхий боловсролын 149 дүгээр сургуулийн угсралтын ажлыг энэ долоо хоногт багтаан дуусгахаар төлөвлөснийг гүйцэтгэгч “Газком” ХХК мэдээлжээ.

Гурван байршлын халаалтын зуухыг хийн системд бүрэн шилжүүлснээр жилд 6,000 орчим тонн хатуу түлшний хэрэглээг зогсоох боломжтой гэж тооцоолсон байна. Энэ нь 1,200 гаруй айлын янданг буулгасантай дүйцэх хэмжээний үр дүн гэж төсөл хэрэгжүүлэгчид үзэж байна.

Халаалтын системийн шинэчлэл нь хатуу түлшний хэрэглээг бууруулах замаар нийслэлийн агаарын бохирдлыг багасгахад чиглэж байгаа бөгөөд бодит үр дүн нь шинэ системүүд ашиглалтад орсны дараа тодорхой болох юм.