Өвөл айсуй: Баянзүрх дүүрэг халтиргаа гулгаанаас сэргийлэх давс, бодисын нөөцөө 85 хувь бүрдүүлжээ

Баянзүрх дүүргийн өвлийн бэлтгэл 90 хувьд хүрч, зам талбайн цэвэрлэгээ, үйлчилгээнд нийтийн аж ахуйн 37 байгууллагын 400 гаруй машин, техник ажиллахаар бэлэн болжээ.

Тухайлбал, Налайх, Гачуурт чиглэлийн авто замын цэвэрлэгээ, үйлчилгээг хариуцдаг “Энхийн өгийн нуур” ХХК 734 мянган ам метр зам талбайд ажиллах 21 автомашин, механизмын бэлэн байдлыг хангасан байна.

Халтиргаа гулгаанаас сэргийлэх давс, бодисын нөөц одоогоор 85 хувьтай байгаа бөгөөд өнгөрсөн жилийнхээс 65 хувиар илүү нөөц бүрдүүлэхээр төлөвлөжээ.

Цас их орсон үед тус компани бүрэн бүрэлдэхүүнээрээ өндөржүүлсэн бэлэн байдалд шилжиж, төв замын зорчих хэсэгт машин техникээр давс, бодис цацах юм. Үүнээс гадна төв зам дагуух хог хаягдал, автобусны буудлын цэвэрлэгээ болон хогийн сав суллах ажлыг өдөр бүр гүйцэтгэдэг байна.

Налайхын авто замаар зорчдог том оврын ачааны автомашинууд даац хэтрүүлэх, хайрга, дайрга болон бетон зуурмагийн бүтээгдэхүүн замд асгах тохиолдол гардаг нь цэвэрлэгээ, үйлчилгээ эрхэлдэг байгууллагуудын ажилд хүндрэл учруулж байгааг албаныхан анхааруулжээ.

Цас орох үед халтиргаа гулгаа үүсч, осол гарах нь нэмэгддэг. Тиймээс цаг уурын урьдчилан сэргийлэх сэрэмжлүүлгийг цаг алдалгүй хүргэж, цэвэрлэгээ үйлчилгээний ажлыг хувийн хэвшил, дүүрэг болон нийслэлийн байгууллагууд уялдаатай зохион байгуулах шаардлагатайг нийслэлийн удирдлага онцолсон байна.