Оюу толгойн зэсийн үйлдвэрлэл III улиралд 27 хувиар өсөж, 113.5 мянган тоннд хүрэв

Rio Tinto группийн 10 дугаар сарын 14-нд нийтэлсэн 2026 оны гуравдугаар улирлын үйлдвэрлэлийн тайлангаар Оюу толгойн зэсийн үйлдвэрлэл өмнөх оны мөн үеэс 27 хувиар өсөж, 113.5 мянган тоннд хүрчээ. Энэ нь өмнөх улирлаас 17 хувиар их бөгөөд оны эхний есөн сарын нийт үйлдвэрлэл 312 мянган тонн болж, 29 хувиар өссөн байна.

Далд уурхайн өргөтгөл гол хөдөлгөгч хүч боллоо

Тайланд дурдсанаар өсөлтийг далд уурхайн үйлдвэрлэлийг үе шаттайгаар нэмэгдүүлж буй ажил, хүдрийн агуулга, авалт сайжирсан нь тодорхойлжээ. Гуравдугаар улиралд нийт 11.2 сая тонн хүдэр боловсруулснаас 3.8 сая тонныг нь далд уурхайгаас олборлосон бөгөөд далд уурхайн хүдрийн зэсийн дундаж агуулга 2.36 хувьд хүрсэн байна. Мөн 493 мянган тонн зэсийн баяжмал үйлдвэрлэж, баяжмалд агуулагдах 123.6 мянган унц алт гаргажээ. Өмнөх оны гуравдугаар улиралд баяжуулах үйлдвэрийн төлөвлөгөөт засвар хийгдсэн бол энэ жил уг засвар хоёрдугаар улиралд хийгдсэн юм.

Rio Tinto-гийн Гүйцэтгэх захирал Саймон Тротт “Оюу толгойн зэсийн үйлдвэрлэл оны эхнээс хойш 29 хувиар өсөж, гуравдугаар улиралд жилийн 450 мянган тонн орчим хүчин чадлаар ажиллалаа” гэж мэдэгджээ. Компани далд уурхайн үйлдвэрлэлийг 2028–2036 онд жилд дунджаар 500 мянган тонн орчим зэс гаргах түвшинд хүргэх төлөвлөгөө хэвээр байгааг онцолсон байна.

Ил уурхайд алтны агуулга буурна

Тайланд дурдсанаар ил уурхайн алтны агуулга өндөртэй хэсгийн олборлолт саяхан дууссан бөгөөд 2026 оны үлдсэн хугацаа болон 2027 онд олборлох дараагийн үе шатуудад алтны агуулга бага байх төлөвтэй. Мөн Засгийн газар 2026 оны 6 дугаар сард Энтрээ Ресурсисийн лицензтэй холбоотой Панель 1-ийн асуудлыг шийдвэрлэх ажлыг эхлүүлэхээр тохиролцсон бөгөөд энэ ажил үргэлжилж буй тул компани Панель 0, Панель 2-ын хойд хэсгийг, дараа нь Панель 2-ын өмнөд хэсгийг түрүүлж ашиглалтад оруулж байгаа аж. Хувьцаа эзэмшигчдийн гэрээний дагуу хийгддэг үечилсэн хяналтын хүрээнд өмнө тохирсон хувьцаа эзэмшигчийн зээлийн хүүгийн өөрчлөлтөд гуравдугаар улиралд албан ёсоор гарын үсэг зурсныг ч тайланд дурджээ.

Rio Tinto группийн зэсийн нийт үйлдвэрлэл гуравдугаар улиралд 205 мянган тонн болж, өмнөх оны мөн үеийн түвшинд хадгалагдсан. Кеннекотт, Эскондида уурхайн бууралтыг Оюу толгойн өсөлт нөхсөн гэж BloombergTV Mongolia онцолжээ. Компанийн 2026 оны зэсийн үйлдвэрлэлийн төлөв 800–870 мянган тонн хэвээр байна.

Оюу толгойн ногдол ашгийг хэрхэн зарцуулах тухай Засгийн газрын санал асуулга, Ашигт малтмалын хуулийн өөрчлөлтийн талаарх хэлэлцүүлэг үргэлжилж буй энэ үед уг тайлан нийтлэгдсэн юм.

Эх сурвалж: Rio Tinto, 2026 оны гуравдугаар улирлын үйлдвэрлэлийн тайлан; BloombergTV Mongolia.