Путины дэмжлэгтэй “Нэгдсэн Орос” нам Төрийн Думын сонгуульд олонхоо хадгалах төлөвтэй байна
ОХУ-ын Ерөнхийлөгч Владимир Путиныг дэмждэг эрх баригч “Нэгдсэн Орос” нам парламентын сонгуулийн урьдчилсан дүнгээр саналын 57.5 хувийг авч, тэргүүллээ. 2022 онд Украинд бүрэн хэмжээний дайн эхэлснээс хойших анхны Төрийн Думын сонгуулийн сүүлийн өдөр Москва болон ойр орчмын бүс нутаг Украины өргөн хүрээний дроны халдлагад өртөв. Сонгуулийн дараа дайнаас буцаж ирэх олон зуун мянган иргэн болон инфляц өндөр, эдийн засгийн өсөлт сул байгаа нөхцөл Кремлийн хувьд дотоодын гол сорилтуудын нэг болж болзошгүйг шинжээч Элина Рыбакова онцолжээ.
ОХУ-ын эрх баригч “Нэгдсэн Орос” нам Төрийн Думын сонгуульд олонхоо хадгалах төлөвтэй байна. ОХУ-ын Сонгуулийн төв комиссын мэдээллээс эш татсан урьдчилсан дүнгээр саналын хуудасны 71 гаруй хувийг тоолоход тус нам 57.5 хувийн санал авчээ.
Оросын парламентын доод танхим болох 450 суудалтай Төрийн Думын уг сонгууль нь 2022 оны хоёрдугаар сард Оросын тал Украинд бүрэн хэмжээний дайн эхлүүлснээс хойших анхны парламентын сонгууль болж буй. Түүнчлэн “Нэгдсэн Орос” нам 2003 оноос хойш Төрийн Думд олонхыг бүрдүүлж ирсэн бөгөөд одоогийн урьдчилсан дүнгээр бусад намуудаас нэлээд өндөр санал авч байна.
Сонгуулийн өрсөлдөөний нөхцөлд сөрөг хүчний оролцоо хязгаарлагдсан талаар олон улсын хэвлэлүүд мэдээлж байгаа юм. Тодруулбал, Украины дайныг эсэргүүцэж буй цорын ганц нам болох либерал чиглэлийн “Яблоко” намын сонгуульд өрсөлдөх эрхийг ОХУ-ын Дээд шүүх наймдугаар сард сонгуулиас хассан. Харин тус намын зарим нэр дэвшигч нэг мандаттай тойргуудад өрсөлдсөн байна.
Сонгуулийн сүүлийн өдөр Москва дроны халдлагад өртөв
Санал хураалтын сүүлийн өдөр Москва болон зарим ойрын муж Украины томоохон дроны халдлагад өртсөн нь сонгуулийн үйл явцтай давхцлаа. Москва хотын дарга Сергей Собянин үүнийг нийслэл рүү чиглэсэн дайсны хамгийн том дроны халдлага хэмээн тодорхойлжээ. Халдлагын улмаас Москвагийн газрын тос боловсруулах үйлдвэрийн байгууламж гэмтэж, хотын зах хэсэг түймэрт өртөж, өтгөн хар утаа харагдсан байна.
Оросын албаныхан халдлагыг сонгуулийг тасалдуулах зорилготой байсан хэмээн мэдэгдэж байгаа юм. Харин Киевийн зүгээс Москвагийн хяналтад байгаа Украины нутаг дэвсгэрийн оршин суугчдыг Оросын сонгуульд оролцуулсныг хууль бус хэмээн буруутгаж буй. Түүнчлэн Европын холбоо болон бусад улс ч эзлэгдсэн нутаг дэвсгэрт санал хураалт зохион байгуулсныг шүүмжилжээ.
Сонгуулийн дараах эдийн засгийн сорилт
Петерсоны Олон улсын эдийн засгийн хүрээлэнгийн ахлах судлаач Элина Рыбакова CNBC-ийн “Squawk Box Europe” нэвтрүүлэгт “Нэгдсэн Орос”-ын саналын хувь 2021 оны сонгуулийнхаас мэдэгдэхүйц өндөр гарах төлөвтэй байгааг онцолжээ.
Түүний үзэж буйгаар Кремлийн хувьд сонгуулийн дүнгээс гадна дайны дараах нийгэм, эдийн засгийн нөхцөл илүү чухал асуудал болох хүлээлттэй байгаа юм. Энхийн хэлэлцээр эсвэл түр гал зогсоох тохиролцоо бий болсон тохиолдолд дайнд оролцсон олон зуун мянган хүн Орост эргэн ирэх бөгөөд тэд өндөр инфляц, өсөлт сул эдийн засагтай нүүр тулна гэж Рыбакова тайлбарлав.
Сонгуулийн эцсийн дүн баталгаажсанаар “Нэгдсэн Орос” 450 суудалтай Төрийн Думд хэдэн суудал авах нь тодорхой болно. Урьдчилсан тооцоогоор тус нам парламент дахь давамгай байр сууриа хадгалах хэмжээнд санал авч байна.
Зеленский Трамптай Нью-Йоркт уулзана
Үүний зэрэгцээ Украины Ерөнхийлөгч Володимир Зеленский энэ долоо хоногт Нью-Йоркт болох НҮБ-ын Ерөнхий Ассамблейн үеэр АНУ-ын Ерөнхийлөгч Дональд Трамптай уулзахаар тохиролцсоноо мэдэгдсэн.
Зеленскийн мэдээлснээр талууд хурцадмал байдлыг намжаах боломж, эрчим хүч болон хүнсний аюулгүй байдал, хүний амь насыг хамгаалах асуудлыг хэлэлцэхээр төлөвлөжээ.