Такаичи: Хятад бол чухал хөрш, бид бүтээлч бөгөөд тогтвортой харилцааг цогцлооно

Японы Ерөнхий сайд Санаэ Такаичи парламентын бодлогын илтгэлдээ Хятадыг “чухал хөрш” хэмээн нэрлэж, хоёр улсын хооронд үүссэн хурцадмал байдлыг үл харгалзан тогтвортой харилцаа бүрдүүлэхийн төлөө ажиллахаа мэдэгдлээ.

Тэрбээр энэ талаар парламентын ээлжит бус чуулганы үеэр “Бүгд Найрамдах Хятад Ард Улс бол чухал хөрш" гэдгийг тодотгож, "Хэдийгээр хүндрэл бэрхшээл байгаа ч бид олон жилийн турш харилцаагаа хөгжүүлж ирсэн” хэмээжээ. Такаичигийн хэлснээр Токио нийтлэг сорилтуудын талаар харилцаа холбоогоо үргэлжлүүлж, үндэсний ашиг сонирхлоо хамгаалах хүрээнд яриа хэлэлцээг дэмжин, “бүтээлч бөгөөд тогтвортой харилцаа” бий болгохыг зорьж байна.

Гэхдээ Япон улс өөрийн байр суурийг тууштай илэрхийлж, Хятадаас “хариуцлагатай үйлдэл” шаардах бодлогоо үргэлжлүүлнэ гэдгийг нэмж тодотгожээ.

Такаичи өнгөрсөн оны арваннэгдүгээр сард Тайваньд халдлага гарвал Японы талаас оролцож болзошгүй гэсэн байр суурь илэрхийлснээс хойш Токио болон Бээжингийн дипломат харилцаа эрс муудаад байгаа юм. Үүний улмаас Хятад өнгөрсөн онд иргэддээ Япон руу зорчихгүй байхыг зөвлөж, худалдааны зарим хязгаарлалт тогтоосон нь Японы компаниудад шаардлагатай газрын ховор элементийн нийлүүлэлтийг мэдэгдэхүйц бууруулсан байна.

Харин өнгөрсөн долоо хоногт Хятадын дипломат бодлогыг хариуцсан өндөр албан тушаалтан Японы худалдааны төлөөлөгчдийг ахлан Бээжинд очсон тус улсын Гадаад хэргийн сайд асантай уулзахдаа хоёр орны харилцааг дахин "хэвийн болгох" шаардлагатай байгааг илэрхийлсэн юм.

Хүн амын бууралт бол "Үндэсний хямрал"

Үүний зэрэгцээ Такаичи гадаад харилцаанаас гадна Японы хүн амын бууралтыг “чимээгүй өрнөж буй үндэсний хямрал” хэмээн тодорхойлж, оны эцэс гэхэд асуудлыг шийдвэрлэх цогц стратеги боловсруулахаа амлалаа.

Засгийн газрын долдугаар сард нийтэлсэн мэдээллээр Японд оршин суудаг уугуул иргэдийн тоо сүүлийн 42 жилийн хугацаанд анх удаа 120 саяас буурчээ. Хүн амын бууралт болон хөгшрөлт нь тус улсын урт хугацааны эдийн засаг, нийгмийн бодлогын гол сорилтуудын нэг болоод буй.

Мөн Такаичи идэвхтэй боловч хариуцлагатай төсвийн бодлого баримтлахаа дахин мэдэгдсэн байна. Түүний төсвийг тэлэх бодлого нь Японы өрийн тогтвортой байдалд болгоомжлол төрүүлж, Засгийн газрын урт хугацаатай бондын өгөөж өсөхөд голлон нөлөөлж байгаа тул зах зээлийн итгэлийг хадгалах нь Токиогийн эдийн засгийн бодлогын гол сорилтын нэг болоод байгаа юм.