Тейлор Свифт “Patient Zero” хэмээ шинэ дуугаа 9-р сарын 25-нд гаргана

Америкийн дуучин Тейлор Свифт өөрийн “Patient Zero” хэмээх шинэ синглээ есдүгээр сарын 25-ны баасан гарагт гаргахаар болсноо зарлалаа. Дуучин есдүгээр сарын 22-нд Instagram хуудсаараа шинэ бүтээлээ танилцуулж, урьдчилсан захиалгыг албан ёсны цахим хуудсаараа 24 цагийн хугацаанд авч эхэлжээ.

Свифт шинэ дуугаа зарлахаас хэдхэн цагийн өмнө цахим хуудсандаа цаг тоолох хэсэг байршуулж, Instagram танилцуулгынхаа зарим жижиг “o” үсгийг “0” тоогоор сольсон нь шүтэн бишрэгчдийн дунд шинэ бүтээлийн талаарх таамгийг нэмэгдүүлсэн юм. Улмаар цаг тоолол дуусахад “Patient Zero” синглийг албан ёсоор танилцуулжээ.

Шинэ сингл бүх дижитал хөгжмийн платформоор цацагдахын зэрэгцээ CD хэлбэрээр худалдаалагдах юм байна. Свифтийн албан ёсны дэлгүүрт үндсэн “Patient Zero”, акустик болон төгөлдөр хуурын хувилбар гэсэн гурван CD-г тус бүр 3.99 ам.доллароор санал болгож байна. Үндсэн хувилбарын CD нь хоёр талдаа өөр зурагтай цуглуулгын хавтастай бөгөөд хязгаарлагдмал хугацаанд худалдаалагдаж байгаа аж.

“Patient Zero” нь Свифтийн 2025 онд гаргасан 12 дахь студийн цомог “The Life of a Showgirl”-ийн дараах шинэ бүтээлүүдийн нэг болж байна. Тэрбээр 2026 онд “Toy Story 5” хүүхэлдэйн кинонд зориулсан “I Knew It, I Knew You” дуугаа гаргасан бөгөөд уг бүтээл Billboard Hot 100 жагсаалтын нэгдүгээр байрт хүрчээ.

Шинэ синглийн нээлт мөн Свифтийн MTV Video Music Awards-ын арга хэмжээнд оролцохоос хоёр хоногийн өмнө товлогдов. Тэрээр энэ жилийн VMA-аас хөгжмийн видео бүтээлийн найруулга, визуал өгүүлэмжид оруулсан хувь нэмрийг үнэлэх анхны “Artist Director Honors” шагналыг хүртэхээр болсон байна.

“Patient Zero”-ийн дууны агуулга болон шинэ цомогтой холбоотой эсэх талаар Свифт одоогоор дэлгэрэнгүй мэдээлэл өгөөгүй байна.