Туркийн Ерөнхийлөгч Р.Т. Эрдоган НҮБ-ыг энх тайвны үүргээ биелүүлэх чадваргүй болсон хэмээн шүүмжиллээ

Туркийн Ерөнхийлөгч Режеп Тайип Эрдоган мягмар гарагт НҮБ-ын Ерөнхий Ассамблейд үг хэлэхдээ тус байгууллага энх тайван, аюулгүй байдлыг сахин хамгаалах үндсэн үүргээ хангалттай хэрэгжүүлж чадахгүй болсон гэж мэдэгдэн, Аюулгүйн Зөвлөлийг шинэчлэхийг уриаллаа.

Тэрбээр энэ талаар "190 гаруй улсын хүсэл зориг таван улсын шийдвэрээс хамаардаг тогтолцоо шударга биш, мөн бүрэн итгэл төрүүлэх боломжгүй гэдгийг хүлээн зөвшөөрөх хэрэгтэй" хэмээн байр сууриа илэрхийлжээ.

НҮБ-ын Аюулгүйн Зөвлөл 15 гишүүнтэй бөгөөд АНУ, БНХАУ, ОХУ, Франц болон Их Британи гэсэн таван байнгын гишүүн хориг тавих эрхтэй. Аюулгүйн Зөвлөлийн төлөөллийг өргөжүүлэх, гишүүдийн тоо болон бүтцийг өөрчлөх асуудлаарх Засгийн газар хоорондын хэлэлцээ НҮБ-д олон жилийн турш үргэлжилж байгаа бөгөөд энэ онд ч хэлэлцээ явагдсан.

Эрдоган Аюулгүйн Зөвлөлийг илүү өргөн төлөөлөлтэй, хүртээмжтэй болгохыг олон жилийн турш дэмжиж ирсэн. Тэрбээр НҮБ-ыг анх энх тайван, аюулгүй байдлыг сахин хамгаалах зорилгоор байгуулсан ч өдгөө уг үүргээ хэрэгжүүлэх боломж нь хязгаарлагдсан гэж үзэж буй.

Газын асуудлыг дахин хөндөв

Эрдоган илтгэлийнхээ үеэр Газын зурвасын нөхцөл байдлыг мөн онцолж, олон улсын хамтын нийгэмлэгийг Израилд үзүүлэх шахалтаа нэмэгдүүлэхийг уриаллаа. Турк улс Газ дахь Израилын цэргийн ажиллагааг геноцид буюу үй олноор хоморголон устгах алхам хэмээн тодорхойлж ирсэн бол Израил уг буруутгалыг няцаадаг.

Түүнчлэн Палестины Ерөнхийлөгч Махмуд Аббас НҮБ-ын Ерөнхий Ассамблейн танхимд хоёр жил дараалан биечлэн оролцож чадаагүйг Эрдоган шүүмжилж, Палестиныг тусгаар улс хэмээн хүлээн зөвшөөрөөгүй орнуудад байр сууриа эргэн харахыг уриалжээ.

Газын зурвас болон Баруун эргийн асуудал 2026 онд НҮБ-ын хэлэлцүүлгийн гол сэдвүүдийн нэг хэвээр байна. НҮБ хоёр улсын шийдэлд хүрэх, Газад хүмүүнлэгийн тусламжийг саадгүй хүргэх, талууд олон улсын болон хүмүүнлэгийн эрх зүйн үүргээ биелүүлэх шаардлагыг үргэлжлүүлэн онцолжээ.