Улсын хэмжээнд өрхийн тоо 10 гаруй хувиар өссөн ч 41 хувь нь хүүхэдгүй байна

Монгол Улсын нийт өрхийн тоо 2025 онд нэг саяд хүрч, 2020 оноос 12.1 хувиар нэмэгджээ. Өрхийн 41 хувь нь хүүхэдгүй, үлдсэн 59 хувь нь хүүхэдтэй бол хүүхдийн тоогоор сууцны нөхцөлийг харьцуулахад хоёр хүүхэдтэй өрхийн 41.1 хувь нь орон сууцанд, тав ба түүнээс дээш хүүхэдтэй өрхийн 41.7 хувь нь гэрт амьдарч байна.

Өрхийн тоо өсөхтэй зэрэгцэн гэрт амьдардаг өрхүүдийн ариун цэвэр, хог хаягдал болон бохир усны менежментийн нөхцөл хот, хөдөөд харилцан адилгүй байна. 2025 оны байдлаар хот суурин газарт гэрт амьдардаг 184,000 өрхийн 93.2 хувь нь энгийн нүхэн жорлон ашиглаж байгаа бол 2,024 өрх тогтсон бие засах газаргүй гэж хариулжээ.

Харин орон нутагт гэрт амьдардаг 208,900 өрхийн 69 хувь нь энгийн нүхэн жорлон, хотод гэрт амьдардаг өрхүүдийн энгийн нүхэн жорлонгийн хэрэглээ хөдөөгийнхөөс 24.2 нэгж хувиар өндөр байна.

Ариун цэврийн байгууламжаас гадна хог хаягдал, бохир ус зайлуулах нөхцөлд хот, хөдөөгийн ялгаа ажиглагджээ. Тухайлбал, хөдөө гэрт амьдардаг өрхийн 56.2 хувь нь хог хаях тогтсон цэггүй бол эдгээр өрхийн 68.4 хувь нь ахуйн бохирын усаа задгай асгадаг аж. Харин хотод гэрт амьдардаг өрхийн 89.3 хувь нь хог хаягдлаа үйлчилгээний байгууллагаар дамжуулан зайлуулдаг байна.

Ийнхүү нийт өрхийн тоо сүүлийн таван жилд өссөн ч гэрт амьдардаг өрхүүдийн ариун цэвэр, хог хаягдал болон бохир ус зайлуулах нөхцөлд томоохон ялгаа хэвээр байна. Ялангуяа хөдөөд хог хаях тогтсон цэггүй, бохирын усаа задгай асгадаг өрхийн эзлэх хувь өндөр байгаа нь ахуйн хаягдлын менежмент, ариун цэврийн үйлчилгээний хүртээмжийг сайжруулах шаардлагатайг харуулж байна.