Японы JOIN сан Монголын дэд бүтцийн төслүүдэд хөрөнгө оруулах боломжийг хэлэлцжээ

Япон улсын тээвэр, хот байгуулалт болон дэд бүтцийн гадаад төслүүдийг дэмждэг төр, хувийн хэвшлийн хөрөнгө оруулалтын “JOIN” сан Монголд хэрэгжүүлэх боломжтой дунд болон том хэмжээний төслүүдийн санхүүжилт, хөрөнгө оруулалтын хувилбаруудыг танилцууллаа.

“JOIN” сан Японы компаниудын тээвэр, хот байгуулалт зэрэг дэд бүтцийн төслөөр гадаад зах зээлд гарах үйл ажиллагааг дэмжих зорилгоор 2014 онд байгуулагджээ. Тус байгууллагын хөрөнгө өнгөрсөн гуравдугаар сарын байдлаар 284.65 тэрбум иенд хүрсэн байна. Үүнээс Японы Засгийн газрын оруулсан хөрөнгө 278.7 тэрбум иен, Японы хувийн хэвшлийн компаниудынх 5.9 тэрбум иен аж.

“JOIN” Японы компаниудтай хамтран төсөлд хөрөнгө оруулж, хөрөнгө оруулалтын эрсдэлийг хуваалцахын зэрэгцээ Японы Олон улсын хамтын ажиллагааны агентлаг JICA, Олон улсын хамтын ажиллагааны банк JBIC зэрэг төрийн байгууллагуудтай уялдуулан ажилладаг байна. Мөн төслийн компанийн удирдлагад оролцох, тухайн улсын Засгийн газартай хийх хэлэлцээнд дэмжлэг үзүүлэх боломжтой.

Гэхдээ JOIN-ийн хөрөнгө оруулалт төсөл бүрд нээлттэй гэсэн үг биш. Тус байгууллага хэрэгжүүлж буй төслүүддээ Японы технологи, туршлага ашиглах боломж, хувийн хэвшлийн оролцоо, эдийн засгийн үр ашиг, байгаль орчин, нийгмийн нөлөөлөл болон хөрөнгө оруулалтаа урт хугацаанд нөхөх боломж зэрэг шалгуурыг үнэлдэг байна. Хувийн хэвшлийн түншүүд өөрсдийн хөрөнгөө төсөлд оруулах шаардлагатай бөгөөд JOIN нь Японы хөрөнгө оруулагчдын дунд хамгийн том хувьцаа эзэмшигч болохгүй гэсэн зарчимтай.

Монгол, Япон жишиг төсөл хэрэгжүүлэхээр ажиллана

Хоёр улсын дэд бүтцийн хамтын ажиллагаа зөвхөн энэ удаагийн форумаар эхэлж буй биш юм. Японы Газар, дэд бүтэц, тээвэр, аялал жуулчлалын яам Монголын Эдийн засаг, хөгжлийн яам болон Хот байгуулалт, барилга, орон сууцжуулалтын яамтай өнгөрсөн хоёрдугаар сард хамтын ажиллагааны санамж бичиг байгуулсан. Тус баримт бичгээр хот байгуулалт, дэд бүтцийн төр, хувийн хэвшлийн түншлэлийн төслүүдийг хөгжүүлэх тогтолцоо бүрдүүлэх, хоёр улсын байгууллага, компаниудын яриа хэлэлцээг өргөжүүлэхээр тохирсон юм.

Улаанбаатарын форумын үеэр “Төр, хувийн хэвшлийн түншлэлийн төв” Монголын ТХХТ-ийн хууль эрх зүйн орчин, төсөл боловсруулах, үнэлэх, сонгон шалгаруулах үйл явц болон төлөвлөж буй төслүүдээ Японы талд танилцуулжээ. Хот байгуулалт, орон сууц, эрчим хүчний хэмнэлттэй барилгын чиглэлийн төслүүд мөн хэлэлцүүлэгт багтсан байна.