Засгийн газар Оюутолгойн ногдол ашгийн 2 их наяд төгрөгөөр дэд бүтцийн төслүүд санхүүжүүлэх саналаасаа татгалзлаа

Засгийн газар Оюутолгойн ногдол ашгийн 2 их наяд төгрөгөөр ДЦС-VI, 10 аймгийн дулааны станц зэрэг нийгмийн болон суурь дэд бүтцийн төслүүдийг санхүүжүүлэхээр тусгасан хуулийн төслөө аравдугаар сарын 23-нд УИХ-аас татан авсан.

Монгол Улсын Ерөнхий сайд Төрийн ордонд сэтгүүлчдэд мэдээлэл өгөхдөө УИХ-ын зургаан байнгын хорооны хэлэлцүүлгийн дараа зарчмын зөрүүтэй 235 санал гарсан нь Засгийн газрын бодлоготой нийцээгүй тул ээлжит бус хуралдаанаар төслөө татах шийдвэр гаргасныг тайлбарлав.

Анх Засгийн газар Оюутолгойгоос 2027 онд 3 их наяд төгрөгийн ногдол ашиг авахаар тооцож, үүний 1 их наядыг Хуримтлалын санд төвлөрүүлж, үлдсэн 2 их наядыг эрчим хүч, боловсролын салбарын төслүүдэд зарцуулах санал УИХ-д өргөн мэдүүлжээ.

Харин хуулийн төслийг татсанаар 2 их наяд төгрөгийг дэд бүтцийн төслүүдэд зарцуулах анхны санал хэрэгжихгүй болж байна.

Ерөнхий сайдын мэдээлснээр, Засгийн газар Оюутолгойн хувь нийлүүлэгчдийн гэрээтэй холбоотой хэлэлцээрийн хүрээнд 30 их наяд төгрөгийн зардлыг бууруулах тохиролцоонд хүрч, холбогдох гэрээнд гарын үсэг зуржээ. Мөн зээлийн хүүгийн нөхцөлийг гурван жил тутамд хэлэлцэх боломж бүрдсэн гэж мэдэгдэв.

Түүнчлэн Оюутолгойн ногдол ашиг авах хугацааг 2037 оноос 2027 он болгон 10 жилээр наашлуулах тохиролцоонд хүрсэн хэмээн тайлбарлалаа. Түүний хэлснээр, “Рио Тинто”-гийн гүйцэтгэх захирал Монголд айлчлах үеэрээ 2027 оноос ногдол ашиг олгох тохиролцоог дахин баталгаажуулсан байна.

Гэхдээ 2027 онд Монголын талд олгох ногдол ашгийн эцсийн хэмжээг хараахан тохиролцоогүй бөгөөд Засгийн газар энэ асуудлаар хэлэлцээг үргэлжлүүлэхээр болжээ.

Хуулийн төслийг татсан нь Оюутолгойн ногдол ашиг авах асуудлаас татгалзсан хэрэг биш гэдгийг Ерөнхий сайд онцолсон юм. Тэрбээр ногдол ашгийн хэмжээг эцэслэн тохиролцсоны дараа холбогдох хуваарийн дагуу Хуримтлалын санд төвлөрүүлж, эрүүл мэнд, боловсрол, орон сууцны зориулалтаар зарцуулна гэж мэдэгдлээ.