Al Jazeera Ш.Алтантуяагийн хэргийн тухай хоёр ангит баримтат кино нийтэллээ

Катарын Al Jazeera телевизийн «101 East» нэвтрүүлэг 2006 онд Малайзад амь насаа алдсан монгол бүсгүй Ш.Алтантуяагийн хэргийн тухай «Murder in Malaysia: Justice for Altantuya Shaariibuu» («Малайз дахь аллага: Алтантуяа Шаарийбуугийн төлөөх шударга ёс») баримтат киног 10 дугаар сарын 17-нд нийтэллээ. Хоёр ангит тусгай нэвтрүүлгийн эхний анги 10 дугаар сарын 18-нд, хоёр дахь анги 10 дугаар сарын 22-нд цацагдахаар хуваарьт тусгагджээ.

Al Jazeera-гийн танилцуулгад дурдсанаар хорин жилийн өмнө Малайзын тусгай хүчний хоёр цагдаа Ш.Алтантуяаг харгис хэрцгийгээр хөнөөж, цогцсыг нь цэргийн зориулалттай C4 тэсрэх бодисоор устгасан. Гэвч түүнийг ямар шалтгаанаар хөнөөсөн нь өнөөг хүртэл тогтоогдоогүй тул түүний амыг хаахын тулд улс төрийн хуйвалдаан хийсэн байж болзошгүй гэсэн хардлага бий болсон байна.

Нэвтрүүлгийн баг Монгол, Малайз, Франц, Австралид ажиллаж, эрүүгийн хэргийн шүүх хуралдаанд хөндлөнгөөс нөлөөлсөн гэх мэдээлэл, Ш.Алтантуяаг авлигын хэрэгт холбогдсон гэгдэх шумбагч онгоцны хэлцэлтэй холбож буй таамаг, мөн хэргийг үйлдсэн хоёр цагдаа Малайзын Ерөнхий сайд асан Нажиб Разакийн тушаалаар ажилласан гэх мэдэгдлийг судалжээ. Авлигын хэргээр ял сонссон Нажиб Разак энэ аллагад ямар нэг байдлаар холбогдоогүй гэж эрс үгүйсгэдэг.

Баримтат кино нийтлэгдсэний дараа энэ сэдэв монгол хэрэглэгчдийн X сүлжээнд өргөн хэлэлцэгдлээ. Ерөнхий сайд асан Г.Занданшатар «Монгол хүний амь золиос болох ёсгүй. Шударга ёсны төлөөх тэмцэлд С.Шаарийбуу гуай ганцаараа зогсох ёсгүй» гэж бичиж, баримтат киног үзэж, түгээхийг #JusticeForAltantuya хаштагаар уриалав. X хэрэглэгчдийн түгээсэн бичлэгт Г.Занданшатар Ш.Алтантуяагийн ар гэр болон Монгол Улсын Засгийн газар хариуцлага нэхэж байгааг онцолжээ.