Хиймэл оюун нүүрний ганц зургаас хорт хавдартай өвчтөний амьдрах магадлалыг таамаглах боломжтойг судалгаа харуулжээ

АНУ-ын Массачусетс мужийн Mass General Brigham эрүүл мэндийн тогтолцооны эрдэмтэд хорт хавдартай өвчтөний амьдрах магадлалыг нүүрний ганц энгийн зургаас таамаглах хиймэл оюуны хэрэгсэл боловсруулжээ. Судалгааны үр дүн 10-р сарын 19-нд The Lancet Digital Health сэтгүүлд нийтлэгдсэн бөгөөд The Guardian, Scientific American зэрэг хэвлэлүүд мэдээлэв.

40 сая зураг дээр суралцсан суурь загвар

FAHR-Face нэртэй уг суурь загварыг (foundation model) янз бүрийн угсаа, насны хүмүүсийн 40 сая гаруй нүүрний зураг дээр тодорхой даалгаваргүйгээр урьдчилан сургаж, дараа нь хоёр өөр зориулалтаар нарийвчлан тохируулсан. FAHR-FaceAge нь хүний биологийн буюу “харагдаж буй” насыг тооцоолдог бол FAHR-FaceSurvival нь хорт хавдартай өвчтөний амьдрах магадлалыг зургаас шууд таамагладаг.

Судалгааны хамтран удирдагч Хьюго Эртс “Бидний мэдэж байгаагаар энэ бол хиймэл оюуны загвар энгийн нэг зургаас хорт хавдартай өвчтөний амьдрах хугацааг шууд таамаглаж чадсаны анхны жишээ” гэжээ. Түүний хэлснээр суурь загварын арга нь биологийн нас, амьдрах магадлал зэрэг олон төрлийн эрүүл мэндийн үзүүлэлтийг загвар бүрийг шинээр сургахгүйгээр боловсруулах боломж олгож байна.

Үр дүн

The Guardian-ийн мэдээлснээр АНУ-д туяа эмчилгээ хийлгэсэн хорт хавдартай өвчтөнүүдийн дунд FAHR-FaceAge-ийн дүгнэлтээр бодит наснаасаа 5 ба түүнээс дээш насаар ахимаг харагдсан хүмүүсийн дунджаар дөрвөн жилийн хяналтын хугацаанд нас барах эрсдэл бусдаас 21 хувиар өндөр, харин 5 ба түүнээс дээш насаар залуу харагдсан хүмүүсийнх 17 хувиар бага байжээ.

Scientific American-ийн бичсэнээр 3,820 хорт хавдартай өвчтөний туршилтын бүлэгт FAHR-FaceSurvival хамгийн өндөр эрсдэлтэй гэж үнэлсэн 122 хүний 64 нь зураг авахуулснаас хойш 90 хоногийн дотор нас баржээ. Хоёр загварын үнэлгээг эмнэлзүйн таамаглалын загварт хамтад нь оруулахад аль нэгийг дангаар нь ашиглахаас илүү нарийвчлалтай болдог аж. Загвар нүүрний өөр өөр хэсэгт анхаардаг бөгөөд насыг тооцоолохдоо хамар, амны хоорондох атираа, духыг, амьдрах магадлалыг таамаглахдаа хамрын нуруу, нүдний доод хэсгийг голчлон “хардаг” байна.

Мөн архи их хэрэглэх, мансууруулах бодис хэрэглэх, тамхи татах нь насаа бодвол ахимаг харагдахтай холбоотой байсан. Загвар зургийн өнцөг, гэрэлтүүлэг, нүүрний хувирал, будалт зэрэгт тогтвортой ажилласан бөгөөд гоо сайхны мэс заслын ихэнх төрөлд нөлөөлөгдөөгүй, зөвхөн хамрын хэлбэр засах мэс заслын дараа бага зэргийн өөрчлөлт ажиглагджээ.

Эмнэлэгт нэвтрүүлэхэд эрт байна

Mass General Brigham-ын туяа эмчилгээний эмч Рэймонд Мак “Хүн ам хөгшрөхийн хэрээр туяа эмчилгээ, мэс засал зэрэг хүнд эмчилгээг санал болгохын өмнө өвчтөний биеийн нөөц бололцоо, сул доройтлыг илүү сайн үнэлэх арга эмч нарт хэрэгтэй байна. Бидний зорилго бол эмчийн шийдвэрийг орлох биш, хувь хүнд тохирсон эмчилгээний шийдвэрийг дэмжих явдал” гэжээ.

Гэсэн хэдий ч судлаачид энэ хэрэгслийг эмнэлгийн практикт өргөн ашиглахаас өмнө нэмэлт судалгаа шаардлагатай гэж анхааруулсан. Scientific American-ийн тэмдэглэснээр амьдрах магадлалын загварыг ихэнх нь цагаан арьстан бүхий Бостон орчмын өвчтөнүүдийн өгөгдлөөр сургасан тул илүү олон янзын хүн амын мэдээллээр баяжуулах шаардлагатай. Нью-Йоркийн их сургуулийн Биоёс зүйн төвийн захирал Мэттью Ляо алдаатай таамаглал тусламж хэрэгтэй хүнийг эмчилгээгүй орхих эрсдэлтэй, мөн даатгалын компани, ажил олгогчид ийм технологийг буруугаар ашиглаж болзошгүйг анхааруулжээ.

---

Эх сурвалж: The Guardian, Scientific American, The Lancet Digital Health. Зураг: Mass General Brigham (Scientific American-аар).