Хятад улс хөрөнгө болон мэргэжилтнүүдийг хилээр гарахыг хязгаарлах шинэ журам хэрэгжүүлж эхэллээ

Хятад улс иргэдийг хилээр гарахыг хязгаарлах эрх зүйн зохицуулалтаа өргөжүүлж, хөрөнгө болон өндөр ур чадвартай мэргэжилтнүүдийн гадагшлах урсгалд тавих хяналтаа чангатгалаа. Төрийн зөвлөлөөс баталж, мягмар гарагаас хэрэгжиж эхэлсэн шинэ журам нь урьд өмнө тохиолдол бүрээр хэрэглэж ирсэн хилээр гарах хоригийг илүү тогтсон зохицуулалт болгох эрх зүйн үндэс бүрдүүлж байна.

Шинэ журмаар экспортын хяналт болон технологи дамжуулахтай холбоотой зөрчил нь үндэсний аюулгүй байдалд эрсдэл учруулна гэж үзсэн тохиолдолд Хятадын иргэнийг хилээр гарахыг хориглож болохоор болжээ.

Хөрөнгө оруулалтын банкны “Evercore ISI”-ийн Хятадын стратегич Нео Вангийн тайлбарласнаар бодлогын зорилго нь гадагш зорчих иргэдийн урсгалыг хязгаарлах замаар тэднийг даган гарах боломжтой капитал, мэргэжлийн хүний нөөцийг дотооддоо хадгалахад чиглэж байна. Инновац, бүтээмж болон эдийн засгийн өсөлтийн шинэ хөдөлгүүр бий болгохоор зорьж буй Бээжингийн хувьд дээрх хоёр нөөц стратегийн ач холбогдолтой гэж тэр үзжээ.

Технологийн мэргэжилтнүүдийн хяналт чангарав

Бээжин сүүлийн жилүүдэд намын албан тушаалтнууд болон төрийн өмчит компанийн ажилтнуудын гадаад зорчих хөдөлгөөнд тавих хяналтаа нэмэгдүүлсэн бол уг бодлого хувийн хэвшилд ч аажмаар хүрээгээ тэлж байна.

Улс төрийн зөвлөх “Eurasia Group”-ийн Хятад хариуцсан захирал Дэн Вангийн үзэж буйгаар шинэ журам нь өмнөх хязгаарлалтыг илүү тогтмол хэрэгжүүлэх боломж олгож, орон нутгийн албан тушаалтнуудыг хил дээрх бичиг баримтын шалгалтаа чангатгахад хүргэж болзошгүй.

Ялангуяа технологийн салбарын мэргэжилтнүүдэд хяналт илүү хүчтэй үйлчлэхээр байна. Хятад улс газрын ховор элемент, цахилгаан автомашины батарей, нарны хавтан зэрэг стратегийн ач холбогдолтой технологи, эд ангийн экспортод аль хэдийн хязгаарлалт тогтоосон.

Хятадад төвлөрөн судалгаа хийдэг “Hutong Research”-ийн түнш Гуо Шаний тайлбарласнаар шинэ зохицуулалт экспортын хяналт болон эсрэг хориг арга хэмжээний дэглэмийг хил дээр шууд хэрэгжүүлэх эрх зүйн үндсийг бэхжүүлжээ. Тухайлбал, тухайн иргэн гадагш зорчих нь экспортын хяналтын дүрмийг зөрчиж, улсын үйлдвэрлэл эсвэл технологийн аюулгүй байдалд эрсдэл учруулна гэж үзвэл хилээр гарахыг нь хязгаарлаж болох юм.

Дэн Вангийн үзэж буйгаар экспортын хяналтыг иргэдийн хилээр гарах эрхтэй шууд холбосноор Бээжин гадаадын засгийн газар болон компаниудтай харилцахдаа нэмэлт хөшүүрэгтэй болж байна.

Чинээлэг өрхүүдийн хөрөнгийн урсгалд хяналт нэмэгдэв

Шинэ зохицуулалт чинээлэг хятад үйлчлүүлэгчдийн хөрөнгийг гадаадад удирддаг хувийн банкны ажилтнуудын үйл ажиллагаанд ч нөлөөлж эхэлжээ. Эх газрын Хятадын үйлчлүүлэгчдэд үйлчилгээ үзүүлдэг оффшор хөрөнгө удирдлагын компаниудын мэдээлснээр зарим банкны ажилтнаас Хятадын хил дээр зорчих шалтгааныг нь асууж, ирэхээсээ өмнө хүсэлт гаргахыг шаардсан тохиолдол бүртгэгдсэн байна.

Сингапурт ажилладаг хөрөнгө оруулалтын сангийн менежерийн мэдээлснээр хувийн банкнууд эх газрын чинээлэг үйлчлүүлэгчдээ Сингапур дахь арга хэмжээнд урихдаа ч болгоомжлох болжээ. Зарим байгууллага гадаадын хөрөнгө оруулалтын семинар гэхийн оронд үнэт эдлэлийн үзэсгэлэн гэх мэтээр арга хэмжээний нэршлээ өөрчилж байгаа аж.

Мөн Сингапурт ажилладаг Фань овогтой банкны ажилтан зарим хамтрагч нь үйлчлүүлэгчдийн санхүүгийн мэдээлэл агуулсан баримт бичгээ биедээ авч явахаа больсон гэж ярьжээ. Гаалийн гэнэтийн шалгалтаар мэдээлэлд нэвтрэх эрсдэлийг бууруулахын тулд бичиг баримтыг тусад нь шуудангаар илгээх болсон байна.

Шинэ журамд гадаадын компани эх газрын Хятадад хил нэвтрэх болон цагаачлалын үйлчилгээ үзүүлэхийг хориглосон заалт мөн багтжээ. Бүртгэлтэй агентлагууд төрийн байгууллагын ажилтан болон цэргийн алба хаагч гадаадын иргэншил, байнгын оршин суух эрхийг хууль бусаар хүссэн тохиолдлыг мэдээлэх үүрэгтэй.

Уг шаардлага нь эх газрын үйлчлүүлэгчдийн цагаачлал, боловсрол болон үл хөдлөх хөрөнгийн хүсэлтийг хариуцдаг Хонконг, Сингапурын зуучлагчдын зардлыг өсгөж, Хятадад дотоодын хуулийн этгээд байгуулах хэрэгцээг нэмэгдүүлж болзошгүй гэж “Eurasia Group” үзэж байна.

Оффшор хөрөнгийн татварын хяналт өргөжив

Хилээр гарах хяналт чангарахын зэрэгцээ Хятад улс чинээлэг өрхүүдийн оффшор хөрөнгөд ногдуулах татварын зохицуулалтаа өргөжүүлж байна.

Долдугаар сард эрх баригчид 2023 оноос хойш оффшор трастад шилжүүлсэн хөрөнгөд 20 хувийн орлогын татвар ногдуулсан. Ингэснээр хөрөнгөө хамгаалах, өв залгамжлалаа зохицуулах зорилгоор чинээлэг гэр бүлүүдийн ашиглаж ирсэн татварын нэг боломжийг хаажээ. Орон нутгийн татварын байгууллагууд Хятадын иргэдийн гадаадаас олсон цалин болон даатгалын орлогод ч татвар ногдуулж эхэлсэн талаар мэдээлсэн байна.

Мөн энэ сарын эхээр зохицуулагчид гадаадын хөрөнгө оруулалттай аж ахуйн нэгжээс гадаадын иргэдийн авсан ногдол ашигт 20 хувийн татвар тогтоожээ. Ингэснээр татварын хөнгөлөлт эдлэх зорилгоор гадаадын иргэншил авах нь Хятадын бизнес эрхлэгчдэд өмнөхөөсөө бага давуу талтай болж байна.

“Zhong Lun Law Firm”-ийн түнш Клиффорд Нгийн хэлснээр олон чиглэлд зэрэг хэрэгжиж буй зохицуулалтууд хууль, татварын нөхцөл урьдчилан мэдэгдэлгүй өөрчлөгдөж болзошгүй гэсэн ойлголтыг үйлчлүүлэгчдийн дунд бий болгожээ. Түүний ажигласнаар Хятадад гэр бүл, хөрөнгийн холбоо үлдээгүй хүмүүс бүрмөсөн явах сонголт хийх магадлал нэмэгдэж байгаа бол дотоодод томоохон холбоо хэвээр байгаа хүмүүс шинэ шаардлагыг дагаж мөрдөхийг илүүд үзэж байна.