“Оюу толгой”-н ногдол ашгийг хэрхэн зарцуулах талаар иргэдээс санал авч эхэллээ

Засгийн газар “Рио Тинто” групптэй хийсэн хэлэлцээрийн үр дүнд “Оюу толгой” компаниас ирэх онд анх удаа ногдол ашиг авахаар тохиролцож, ногдол ашгийн хэмжээг 3 их наяд төгрөгөөр тооцож, ирэх оны улсын төсөвт төвлөрүүлэхээр төлөвлөснөө мэдээлсэн.

Урьдчилсан төлөвлөгөөгөөр ногдол ашгийн 2 их наяд төгрөг буюу 66.7 хувийг эрчим хүчний салбарын хүчин чадлыг нэмэгдүүлэх төслүүдэд зарцуулах бол үлдсэн нэг их наяд төгрөг буюу 33.3 хувийг Үндэсний баялгийн санд төвлөрүүлэхээр байгаа юм.

Энэхүү орлого нь улсын төсвийн хөрөнгө оруулалт болон баялгийн хуримтлалыг нэмэгдүүлэх боломж бүрдүүлэх хэдий ч ногдол ашгийн бодит хэмжээ, олгох хугацаа нь компанийн санхүүгийн үр дүн болон холбогдох шийдвэрээс хамаарна.

Ногдол ашгийн зарцуулалтыг иргэдээр хэлэлцүүлнэ

УИХ ирэх оны улсын төсвийн төслийг хэлэлцэж буй энэ үед Ерөнхий сайд Н.Учралын санаачилгаар “Оюу толгой” төслөөс авах ногдол ашгийн зарцуулалтын талаар иргэдийн санал авах ажиллагааг эхлүүлжээ.

Санал асуулгыг өнөөдрөөс эхлэн 14 хоногийн хугацаанд “И-Монголиа” цахим платформоор зохион байгуулна.

Иргэдээс дараах гурван асуудлаар санал авч байна.

Засгийн газар “Оюу толгой” төслөөс ногдол ашиг авах нь зөв эсэх;

Ногдол ашгийг хөгжлийн төсөл, хөтөлбөрүүдэд зарцуулах бол аль салбарыг тэргүүлэх чиглэл болгох;

Ногдол ашгийн орлогыг хэрхэн хуваарилж, зарцуулах нь оновчтой эсэх

Эрчим хүчний салбарт 2 их наяд төгрөгийн хөрөнгө оруулалт хийхээр төлөвлөжээ

Засгийн газрын танилцуулсан хувилбараар ногдол ашгийн дийлэнх хэсгийг эрчим хүчний салбарын хүчин чадлыг нэмэгдүүлэхэд чиглүүлэхээр байна.

Энэ нь эрчим хүчний шинэ эх үүсвэр бий болгох, дэд бүтцийг өргөтгөх, хөрөнгө оруулалтын санхүүжилтийг нэмэгдүүлэх боломжтой гэж үзсэн байна. Гэхдээ 2 их наяд төгрөгийг ямар төслүүдэд, ямар хугацаанд зарцуулах талаарх нарийвчилсан хуваарилалтыг тусад нь тодорхойлох юм.

Харин нэг их наяд төгрөгийг Үндэсний баялгийн санд төвлөрүүлэхээр төлөвлөсөн нь уул уурхайн орлогын тодорхой хэсгийг хуримтлал болгон хадгалах бодлоготой уялдаж байна.

Ийнхүү “Оюу толгой” төслөөс авах ногдол ашиг нь ирэх оны төсвийн хөрөнгө оруулалтын нэг эх үүсвэр болохоор төлөвлөж байгаа ч орлогыг ямар салбарт зарцуулах эцсийн шийдвэр улсын төсвийн хэлэлцүүлэг, холбогдох эрх зүйн шийдвэрээс хамаарна.