“Samsung” хиймэл оюуны дэд бүтцийн “Helix” компанид $1 тэрбумын хөрөнгө оруулалт хийнэ

Өмнөд Солонгосын технологийн “Samsung Electronics” болон группийн таван компани хиймэл оюуны дэд бүтцийн “Helix Digital Infrastructure” компанид 1 тэрбум ам.долларын хөрөнгө оруулалт хийхээр боллоо. “Samsung Electronics” мягмар гарагт мэдээлснээр тус компани нийт хөрөнгө оруулалтын тал буюу 500 сая ам.долларыг дангаар гаргах юм байна. Харин үлдсэн хөрөнгийн барилга, худалдааны “Samsung C&T”, мэдээллийн технологийн үйлчилгээний “Samsung SDS”, батарей үйлдвэрлэгч “Samsung SDI”, мөн “Samsung Life Insurance”, “Samsung Fire & Marine Insurance” компаниуд бүрдүүлэхээр болжээ. Дэлхийн хөрөнгө оруулалтын “KKR” компани “Helix Digital Infrastructure”-ийг өнгөрсөн зургаадугаар сард байгуулсан. Тус компани хиймэл оюуны хэрэглээ өсөхийн хэрээр шаардагдах томоохон дата төвүүдээс гадна цахилгаан үйлдвэрлэл, дамжуулалт, түгээлтийн дэд бүтэц болон шилэн кабелийн сүлжээнд хөрөнгө оруулах чиглэлээр ажилладаг. Харин “Helix”-ийг одоогоор АНУ-ын үүлэн тооцооллын “Amazon Web Services”-ийн гүйцэтгэх захирлаар ажиллаж байсан Адам Селипски удирдаж байгаа юм. “KKR”, Кувейтийн Хөрөнгө оруулалтын газар, хиймэл оюуны чип үйлдвэрлэгч “Nvidia” болон АНУ-ын эрчим хүчний “Vistra” тус компанийн үүсгэн байгуулагч хөрөнгө оруулагчдын тоонд багтжээ.

Хиймэл оюуны дата төв зөвхөн чипээр хязгаарлагдахгүй Хиймэл оюуны тооцооллын эрэлт эрчимтэй нэмэгдэхийн хэрээр дата төвийн хүчин чадлаас гадна тэдгээрийг тогтвортой цахилгаанаар хангах дэд бүтэц салбарын хөрөнгө оруулалтын чухал хэсэг болж байна. “Helix” дата төв болон түүнийг ажиллуулах эрчим хүчний дэд бүтцийг зэрэг хөгжүүлэх замаар өрсөлдөөн нэмэгдэж буй зах зээлд байр сууриа тэлэхээр зорьж буй. “Samsung”-ийн хувьд энэ хөрөнгө оруулалт нь группийн компаниудын технологийг нэг дор ашиглах боломж нээж байна. Тухайлбал, “Samsung Electronics”-ийн хагас дамжуулагч болон хөргөлтийн шийдэл, “Samsung C&T”-ийн дата төвийн барилгын чадавх, “Samsung SDI”-ийн батарейн технологийг хиймэл оюуны дэд бүтцийн төслүүдтэй холбох боломжтой юм. Мөн “Samsung” хөрөнгө оруулалтын үр дүнд “Helix”-тэй хамтран хиймэл оюуны дата төвүүдийг дэлхийн зах зээлд хурдацтай нэвтрүүлэхийн зэрэгцээ оролцогч компаниудын хамтын ажиллагааг өргөжүүлнэ хэмээн мэдээлэв. Шинэ хөрөнгө оруулалт нь “Helix”-т өмнө нь амласан 10 тэрбум гаруй ам.долларын санхүүжилт дээр нэмэгдэж байгаа талаар “KKR” мэдээлжээ. “KKR” одоогоор дэлхий даяар дижитал болон эрчим хүчний дэд бүтцэд 75 тэрбум ам.доллароос дээш хөрөнгө оруулсан бөгөөд 2009 оноос хойш Өмнөд Солонгост оруулсан хөрөнгө нь 9 орчим тэрбум ам.долларт хүрсэн байна.