Сингапур: Ормузын хоолойн тасалдал Азийн асуудал гэх Трампын байр суурь "буруу биш"

Сингапурын Гадаад хэргийн сайд Вивиан Балакришнан Ормузын хоолойгоор дамжих эрчим хүчний урсгал тасалдах нь Азийн орнуудын хувьд томоохон асуудал гэсэн АНУ-ын Ерөнхийлөгч Дональд Трампын байр суурийг “бүрэн буруу биш” гэж мэдэгдлээ.

Балакришнан лхагва гарагт Сингапурт болж буй “Milken Institute Asia Summit 2026”-ийн үеэр CNBC-д ярилцлага өгөхдөө дээрх байр суурийг илэрхийлсэн юм. Тус чуулга уулзалт аравдугаар сарын 7-9-нд Сингапурт болж байгаа бөгөөд Балакришнан эхний өдрийн илтгэгчдийн нэгээр оролцож байна.

Ормузын хоолой нь Персийн буланг Арабын тэнгистэй холбодог бөгөөд түүгээр тээвэрлэгддэг эрчим хүчний томоохон худалдан авагчид нь Азийн орнууд юм. Иймээс урсгал удаан хугацаагаар тасалдах нь бүс нутгийн эрчим хүчний нийлүүлэлтэд шууд нөлөөлөх эрсдэлтэй ажээ.

Трамп өмнө нь Ормузын хоолойг нээлттэй байлгах үүргийг АНУ голлон хүлээхийн оронд эрчим хүчний нийлүүлэлтээс нь хамааралтай Ази болон Европын орнууд илүү оролцоотой байх ёстой гэсэн байр суурь илэрхийлж байв.

Гэхдээ Балакришнан асуудлыг зөвхөн аль улс Ормузын хоолойгоор тээвэрлэсэн газрын тосыг худалдан авч буйгаар хэмжих нь учир дутагдалтай гэж үзэж байна.

Далайн тээврийн чөлөөт байдлыг онцоллоо

Олон улсын усан замаар чөлөөтэй зорчих зарчим Сингапурын хувьд “хэлэлцэх боломжгүй” асуудал гэдгийг Балакришнан онцолжээ. Тэрбээр НҮБ-ын Далайн эрх зүйн конвенцод тусгасан дамжин өнгөрөх болон навигацийн эрх чөлөөг энэ хүрээнд дурдсан байна.

Балакришнан CNBC-д өгсөн ярилцлагадаа энэ талаар “Бидний хувьд энэ бол оршин тогтнохтой холбоотой асуудал" гэдгийг онцолж, "Мөн зарчим, олон улсын эрх зүйн асуудал” хэмээжээ.

Дэлхийн худалдааны томоохон зангилаа болсон Сингапурын хувьд Малаккын хоолой зэрэг олон улсын усан замаар хөлөг онгоц саадгүй зорчих боломж үндэсний урт хугацааны ашиг сонирхолтой нь шууд холбоотой. Балакришнан Сингапур Малаккын хоолойг хаах, хөлөг онгоцыг саатуулах эсвэл төлбөр ногдуулах оролдлогод оролцохгүй гэсэн байр суурийг өмнө нь илэрхийлж байсан.