Томуугийн дэгдэлт: Хүүхэд нь өвдсөн төрийн албан хаагчид тав хоногийн цалинтай чөлөө олгоно

Томуу, томуу төст өвчний дэгдэлт нэмэгдэж байгаатай холбоотойгоор зургаа хүртэлх насны хүүхэд нь өвдсөн төрийн албан хаагч эцэг, эх, асран хамгаалагчид тав хоногийн цалинтай чөлөө олгохоор Засгийн газар шийдвэрлэлээ.

Шаардлагатай тохиолдолд ажилтныг цахимаар ажиллуулах боломжийг мөн уг зохицуулалтад тусгасан талаар Эрүүл мэндийн сайд Э.Батшугар онцоллоо.

Шийдвэр одоогоор зөвхөн төрийн албан хаагчдад үйлчилнэ. Харин хувийн хэвшлийн байгууллагуудыг хүүхэд нь өвдсөн ажилтнууддаа ижил нөхцөлөөр цалинтай чөлөө олгох, боломжтой тохиолдолд цахимаар ажиллуулах зохицуулалтад нэгдэхийг Засгийн газраас уриалжээ.

Уг зохицуулалт томуугийн идэвхтэй улирлыг хамарч, ирэх арваннэгдүгээр сарын 1-нээс 2027 оны гуравдугаар сарын 1 хүртэл хэрэгжинэ.

Амбулаторийн үзлэгийн 46.5 хувийг томуу, томуу төст өвчин эзэлж байна

Энэ жилийн өвчлөл өмнөх жилүүдтэй харьцуулахад өндөр түвшинд хүрснийг салбарын сайд онцлов. Томуугийн өвчлөл ерөнхийдөө есдүгээр сараас эхлэн дараа оны гуравдугаар сар хүртэл идэвхтэй тархдаг. Дэгдэлт нэмэгдэж буйтай холбоотойгоор эрүүл мэндийн салбарын хэмжээнд хэрэгжүүлэх арга хэмжээний төлөвлөгөөг баталж, томууг оношлоход шаардлагатай лабораторийн шинжилгээний хэрэгсэл, урвалжийн дөрвөн сарын нөөцийг бүрдүүлжээ.

Эмнэлгийн орны хүчин чадлыг мөн нэмэгдүүлсэн байна. Өнгөрсөн жилийн томуугийн дэгдэлтийн оргил үед 1,200 ор ашиглаж байсан бол энэ жил болзошгүй эрсдэлийг тооцон 4,000 хүртэлх ор бэлтгэжээ.

Томуугийн вакцины нөөцийг 500 мянган тун болгож нэмэгдүүлжээ

Энэ нь өнгөрсөн жилийн 300 мянган тунгаас 200 мянгаар илүү байна. Эхний ээлжийн 330 мянган тунг хэрэглээнд гаргасан бол есдүгээр сарын 30-нд нэмэлт 170 мянган тун вакцин оруулж иржээ. Нэмэлт вакциныг орон нутаг болон эрүүл мэндийн байгууллагуудад түгээж эхэлсэн бөгөөд зорилтот бүлгийн иргэдийг вакцинжуулалтад хамрагдахыг Эрүүл мэндийн яамнаас уриалав.

280 мянган хүүхдийг эрт илрүүлэгт хамруулна

Хүүхдүүдийг насны онцлогт нь тохируулан дөрвөн бүлэгт хувааж, нийт 280 мянган хүүхдийг эрт илрүүлэгт хамруулахаар төлөвлөсөн байна. Одоогоор 23 мянган хүүхэд үзлэгт хамрагджээ.

Эрүүл мэндийн яам хүүхдийн эрт илрүүлгийг нэг удаагийн арга хэмжээ хэлбэрээр зохион байгуулах бус, эрүүл мэндийн тогтолцооны тогтмол үйлчилгээ болгон хөгжүүлэх зорилт тавьж байгааг салбарын сайд онцлов.