Яармаг-Хархорин чиглэлийн дүүжин зам арванхоёрдугаар сарын 15-нд ашиглалтад орно

Яармаг-Хархорин чиглэлд хэрэгжүүлж буй дүүжин замын тээврийн төслийн барилга угсралтын ажил бүрэн дуусч, гүйцэтгэл 90 хувьд хүрчээ. Механик угсралт бүрэн дуусч, аюулгүй ажиллагааны тохиргоо, туршилтыг өнгөрсөн долоо хоногоос эхлүүлээд байна.

Арванхоёрдугаар сарын 15 гэхэд иргэд дүүжин тээврээр зорчих боломж бүрдэх юм. Яармаг-Хархорин чиглэлийн дүүжин зам 4.2 км урт, хоёр өртөө, 98 кабинтай, цагт 2,320 зорчигч тээвэрлэх хүчин чадалтай байхаар төлөвлөжээ.

Дүүжин зам ашиглалтад орсноор иргэд хэдэн төгрөгөөр зорчих нь одоогоор тодорхойгүй байна. Зорчигчдод үйлчлэхэд шаардлагатай дүрэм, журмын бэлтгэлийн хүрээнд төслийг гүйцэтгэгч “Пома” группийн боловсруулсан 48 дүрэм, журмыг францаас монгол хэл рүү орчуулсан бөгөөд ирэх долоо хоногоос иргэдэд түгээж эхлэхээр төлөвлөсөн байна.

Дүүжин замыг Улсын комисс хоёр үе шаттай хүлээн авах бөгөөд туршилтын үеэр техникийн алдаа гарвал засвар үйлчилгээ хийх тул ашиглалтад оруулах тов хойшилж магадгүйг хотын удирдлагууд өмнө нь мэдээлсэн.

Энэхүү төслийг Францын Засгийн газрын 51 сая ам.долларын нэн хөнгөлөлттэй зээлээр буюу 40 жил ийн хугацаатай, жилийн хүү 0.0076 хувиар тооцон хэрэгжүүлж байна. Дүүжин зам ашиглалтад орсноос хойш 12 дахь жилээс буюу 2038 оноос эргэн төлөлтийг эхлүүлэх аж. Мөн зээлийн үндсэн төлбөрөөс 2035 он хүртэл чөлөөлөх нөхцөлийг тусгажээ.