Амжилтаа бардамнал мэт сонсогдуулахгүйгээр зөв ойлгуулах дөрвөн арга

Хийсэн ажлынхаа үнэ цэнийг бусдад хэрхэн зөв ойлгуулах вэ? Өөрийн амжилтыг хэт тодотгох нь багийнхны хувь нэмрийг үл тоосон шиг харагдах эрсдэлтэй.

“Managing Up” номын зохиогч Мэлөди Уайлдинг ажлын амжилтаа удирдлагад тайлагнахдаа баримтлах дөрвөн зарчим зөвлөж байна. Түүний үзэж буйгаар өөрийгөө зөв таниулахын гол зорилго нь бусдын гавьяаг өөртөө авах бус, багийн үр дүнд өөрийн оруулсан хувь нэмрээ ойлгомжтой тайлбарлах нь чухал аж.

Эхлээд “бид”, дараа нь “би”

Уайлдингийн эхний зөвлөгөө бол багийн амжилтыг түрүүлж тодорхойлоод, дараа нь өөрийн гүйцэтгэсэн үүргийг ялгаж хэлэх юм.

Тухайлбал, төсөл амжилттай хэрэгжсэн бол эхлээд баг ямар үр дүнд хүрснийг тайлбарлаж, дараа нь тухайн үр дүнд хүрэхэд өөрөө ямар үүрэг гүйцэтгэсэн, ямар асуудлыг шийдвэрлэхэд тусалснаа тодорхой хэлэх хэрэгтэй.

Ийм дараалал нь хамтын ажиллагааг үнэлж буй тухайн ажилтны бодит хувь нэмрийг бүдгэрүүлэхгүй. Ялангуяа гүйцэтгэлийн үнэлгээ, удирдлагын уулзалт болон албан тушаал ахихтай холбоотой ярианд ийм арга хэрэгтэй гэж Уайлдинг зөвлөж байна.

Ажлынхаа цар хүрээг тодорхой болгоорой

Хоёр дахь зарчим нь зөвхөн “юу хийсэн”-ээ хэлэх бус, тухайн ажил ямар хэмжээ, хамрах хүрээтэй байсныг тайлбарлах юм.

Хэдэн багтай хамтарсан, ямар чиг үүргийг хариуцсан, байгууллагын аль хэсгийн ажилд нөлөөлсөн зэрэг мэдээлэл нь удирдлагад тухайн үүргийн бодит цар хүрээг ойлгоход тусална.

Ажлын үр дүн ижил харагдаж болох ч нэг багийн хүрээнд гүйцэтгэсэн ажил болон хэд хэдэн нэгжийг уялдуулсан ажил хариуцлагын хувьд ялгаатай. Тиймээс ажлын хамрах хүрээг тодорхойлох нь өөрийн оролцоог хэтрүүлэлгүйгээр үнэ цэнийг нь харуулах нэг арга юм.

Харагддаггүй ажлаа нэрлээрэй

Уайлдинг мөн эцсийн үр дүнгийн ард үлддэг ажлуудаа тодорхой хэлэхийг зөвлөжээ.

Багууд хоорондын уялдааг хангах, ажлын чиглэл тогтоох, бусдыг нэг зорилгод төвлөрүүлэх, саад болж буй асуудлыг шийдвэрлэх зэрэг ажил тайлангийн эцсийн тоон үзүүлэлтэд шууд харагдахгүй байх тохиолдол бий. Гэвч ийм үүрэг нь төслийг урагшлуулахад чухал нөлөөтэй байсан ч юм бил үү?

Тиймээс зөвхөн эцсийн үр дүнг дурдахын оронд ямар саад туулсан, ямар эрсдэлийг бууруулсан, бусад багийн ажлыг хэрхэн урагшлуулснаа тайлбарлах нь гүйцэтгэлийг бүрэн харуулах боломжтой.

Хийсэн ажлаа компанийн зорилготой холбоорой

Дөрөв дэх зарчим нь хийсэн ажлын жагсаалт танилцуулахаас илүүтэй тухайн ажил байгууллагын зорилгод хэрхэн нөлөөлснийг харуулах тухай юм.

Удирдлагын түвшинд ажилтан хэдэн даалгавар гүйцэтгэсэн гэхээс илүүтэй түүний ажил орлого, зардал, хэрэглэгч, бүтээмж эсвэл компанийн бусад зорилтод ямар үр дүн авчирсан нь чухал байдаг гэж Уайлдинг тайлбарлажээ.

Иймээс амжилтаа тайлагнахдаа “Бид ямар үр дүнд хүрсэн, миний хувь нэмэр юу байсан, ажил ямар цар хүрээтэй байсан, байгууллагын зорилгод хэрхэн нөлөөлсөн бэ” гэсэн дарааллаар тайлбарлах нь чухал.

Өөрийгөө зөв таниулах нь нэг удаагийн яриа бус, ажил мэргэжлийн турш үргэлжлэх харилцааны нэг хэсэг юм. Багийн амжилтыг үнэлэхийн зэрэгцээ өөрийн бодит хувь нэмрийг тодорхой хэлж чадвал хийсэн ажил шийдвэр гаргагчдад илүү ойлгомжтой харагдана.