Хаврын морин уралдааныг сэргээх эсэх шийдвэр тав хоногоор хойшиллоо
УИХ Үндэсний их баяр наадмын тухай хуульд нэмэлт, өөрчлөлт оруулах төслийг хэлэлцэх эсэх асуудлыг шийдвэрлэх үеэр МАН-ын бүлэг тав хоногийн завсарлага авлаа.

Өнөөдөр УИХ "Үндэсний их баяр наадмын тухай" хуульд нэмэлт, өөрчлөлт оруулах төслийг хэлэлцэх эсэх асуудлыг хэлэлцлээ.
Энэ үеэр УИХ дахь МАН-ын бүлгийн дарга Ж.Батжаргал УИХ-ын чуулганы хуралдааны дэгийн тухай хуулийн дагуу ажлын тав хоногийн завсарлага авах болсноо мэдэгдэв
Хууль санаачлагчид хаврын морин уралдаан далд хэлбэрээр зохиогддог учраас хяналтад оруулж, хүүхдийн аюулгүй байдлыг хангах зорилготой хэмээн тайлбарлаж буй бол Засгийн газар 2026 оны зургаадугаар сарын 10-ны хуралдаанаараа уг төслийг бүхэлд нь дэмжих боломжгүй гэж үзсэн юм.
НҮБ-ын Хүүхдийн сан арваннэгдүгээр сарын 19-нд Ерөнхий сайдад хүргүүлсэн захидалдаа хаврын уралдаанд 14–17 насны хүүхдийг оролцуулах нь хүүхдийн эрхийг хамгаалах олон улсын гэрээ, конвенцоор хүлээсэн үүрэгтэй зөрчилдөж байгааг анхааруулсан байна.
Мөн Монгол дахь НҮБ-ын Удирдлагын баг 18 нас хүрээгүй хүүхдийг хурдан морь унуулахгүй байхыг Олон улсын хөдөлмөрийн байгууллагаас удаа дараа зөвлөснийг онцолжээ.
УИХ-ын зарим гишүүн хуулийн төслийг хүүхдийн эрх, эрүүл мэнд, аюулгүй байдалд эрсдэл учруулна гэж эсэргүүцэж байгаа бол төсөл санаачлагчид уламжлалт уралдааныг зохицуулалттай, хяналттай зохион байгуулах шаардлагатай гэсэн байр сууриа илэрхийлж байна.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ





