"APEC 2026": Трамп, Путин, Ши Жиньпин нарын түүхэн уулзалт дэлхийн анхаарлын төвд
АНУ-ын Ерөнхийлөгч Дональд Трамп, ОХУ-ын Ерөнхийлөгч Владимир Путин тэргүүтэй дэлхийн удирдагчид пүрэв гарагт “APEC”-ын дээд хэмжээний уулзалтын хоёр дахь өдрийн арга хэмжээнд оролцлоо.

АНУ-ын Ерөнхийлөгч Дональд Трамп, ОХУ-ын Ерөнхийлөгч Владимир Путин тэргүүтэй дэлхийн удирдагчид пүрэв гарагт Ази, Номхон далайн эдийн засгийн хамтын ажиллагааны байгууллага буюу “APEC”-ын дээд хэмжээний уулзалтын хоёр дахь өдрийн арга хэмжээнд оролцлоо. Энэ өдөр АНУ, ОХУ, БНХАУ-ын удирдагчид түүхэндээ анх удаа гурван талт уулзалт хийхээр болжээ.
Пүрэв гарагийн хөтөлбөр БНХАУ-ын Төрийн тэргүүн Ши Жиньпиний мэндчилгээний дараа Олон улсын валютын сангийн тэргүүн Кристалина Георгиевагийн илтгэлээр эхэлсэн юм. Тэрбээр хиймэл оюун болон эрчим хүчний нийлүүлэлтийн гэнэтийн доголдол нь олон улсын эдийн засагт инфляцыг хөөрөгдөж байгааг онцлоод, мөнгөний бодлогыг чангатгах шаардлагатайг мэдэгдсэн байна.
Японы Ерөнхий сайд Санаэ Такаичиг энэ удаад ч хүйтэн хөндий хүлээн авлаа. Тэрбээр Ши Жиньпинтэй хэдэн минутын турш ярилцахыг оролдсон ч Ши Жиньпин хариу үйлдэл үзүүлээгүй бололтой. Тухайн үед тэдний дэргэд орчуулагч байгаагүй аж.
АНУ-ын Ерөнхийлөгч Дональд Трамп өдрийн эхээр Владимир Путин болон Ши Жиньпин нартай тус тусад нь хоёр талт уулзалт хийв. Трамп Ши Жиньпиний удирдах чадварыг өндрөөр үнэлж, Вашингтон APEC-ийн гишүүн хэд хэдэн томоохон эдийн засагтай хэлэлцээр байгуулахаар ажиллаж байгааг мэдэгдсэн байна. Жил гаруйн дараа анх удаа биечлэн уулзсан Трамп, Путин нарын ярианы үеэр АНУ-ын Ерөнхийлөгч ОХУ-ын төрийн тэргүүнийг “найз” хэмээн тодорхойлжээ.
Трамп “Бид бие биеэ олон жилийн турш мэднэ” гэдгийг онцолж, “Энэ уулзалтаас олон сайхан зүйл бий болно, эсвэл ядаж тэдгээрийн эхлэл тавигдана гэж бодож байна” хэмээн Путинд хандан хэлсэн байна.
Гурван улсын удирдагчид пүрэв гарагийн үдээс хойш анх удаа гурван талт уулзалт хийхээр төлөвлөжээ. Уулзалтаар Ойрх Дорнодын мөргөлдөөн, Орос-Украины дайн, худалдаа болон хиймэл оюун ухаантай холбоотой асуудлуудыг хэлэлцэх төлөвтэй байна. Гэсэн хэдий ч түүхэн ач холбогдолтой энэхүү уулзалтаас бодитой үр дүн гарах хүлээлт төдийлөн өндөр биш байгаа юм.
“APEC”-ийн дээд хэмжээний уулзалтаар Дональд Трампын Азийн орнуудад хийсэн шахуу хуваарьтай айлчлал өндөрлөх бөгөөд үүний дараа тэрбээр АНУ-ын нийслэл Вашингтон хотыг зорих юм.
“APEC”-ийн дээд хэмжээний уулзалтын хоёр дахь буюу сүүлийн өдрийн онцлох үйл явдлуудыг гэрэл зургаар хүргэж байна.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ





