Ерөнхийлөгчийн албан тушаалаасаа чөлөөлөгдөх хүсэлтийг Төрийн байгуулалтын байнгын хороо 77.8 хувийн саналаар дэмжлээ
УИХ-ын Төрийн байгуулалтын байнгын хорооны хуралдаанд оролцсон 18 гишүүний 14 нь Ерөнхийлөгч У.Хүрэлсүхийг өөрийн хүсэлтээр үүрэгт ажлаас нь чөлөөлөх саналыг дэмжжээ.

УИХ-ын Төрийн байгуулалтын байнгын хороо Монгол Улсын Ерөнхийлөгч У.Хүрэлсүхийг өөрийн хүсэлтээр үүрэгт ажлаас нь чөлөөлөх асуудлыг хэлэлцэж, хуралдаанд оролцсон гишүүдийн 77.8 хувийн саналаар дэмжлээ.
Санал хураалтад нийт 18 гишүүн оролцсоноос 14 нь дэмжиж, дөрвөн гишүүн дэмжээгүй байна.
Хуралдааны үеэр УИХ-ын гишүүн Б.Жавхлан Ерөнхийлөгчийн ирүүлсэн хүсэлт болон судалсан ажлын хэсгийн талаар танилцуулав. Түүний мэдээлснээр, Ерөнхийлөгчийн хүсэлтийг судлан дүгнэх ажлын хэсэгт УИХ-ын гишүүн Н.Алтанхуяг, Ж.Мөнхбат нар ажиллажээ.
Ерөнхийлөгч У.Хүрэлсүх хүсэлтдээ Монгол Улсын Ерөнхийлөгчийн тухай хуулийн 6.3.1 дэх заалт болон Үндсэн хуулийн 25 дугаар зүйлийн 1 дэх хэсгийн 5 дахь заалтыг үндэслэл болгосон байна.
Ерөнхийлөгчийн тухай хуулийн 6.3.1-д төрийн тэргүүн эрүүл мэндийн байдал болон хүндэтгэн үзэх бусад шалтгаанаар бүрэн эрхээ хэрэгжүүлэх боломжгүй гэж үзвэл УИХ-д хүсэлт гарган үүрэгт ажлаасаа чөлөөлөгдөж болох тухай заасан байдаг.
Харин Үндсэн хуулийн 25 дугаар зүйлд Ерөнхийлөгчийг сонгох, чөлөөлөх, огцруулах асуудлыг хэлэлцэн шийдвэрлэх нь УИХ-ын онцгой бүрэн эрх болохыг тусгасан.
Байнгын хороо түүний саналыг дэмжсэн нь Ерөнхийлөгчийг албан ёсоор чөлөөлсөн эцсийн шийдвэр биш юм. Уг асуудлыг УИХ-ын чуулганы нэгдсэн хуралдаанаар хэлэлцэн шийдвэрлэнэ.
Ерөнхийлөгчийг үүрэгт ажлаас нь чөлөөлөх шийдвэр эцэслэн гарсан тохиолдолд шинэ Ерөнхийлөгч тангараг өргөх хүртэл төрийн тэргүүний бүрэн эрхийг УИХ-ын дарга хэрэгжүүлэх зохицуулалттай.
Ийнхүү Ерөнхийлөгч У.Хүрэлсүхийн өөрийн хүсэлтээр албан тушаалаасаа чөлөөлөгдөх асуудал парламентын Байнгын хорооны шатанд дэмжигдэж, УИХ-ын нэгдсэн хуралдааны шийдвэрийг хүлээж байна.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ





