АНУ-ын Завсрын сонгуулийн сурталчилгааны зардал 12 тэрбум ам.доллар давж, дээд амжилт тогтоожээ
АНУ-ын 2025–2026 оны сонгуулийн мөчлөгт улс төрийн сурталчилгаанд 12.06 тэрбум ам.доллар зарцуулсан нь Ерөнхийлөгчийн сонгуулийн сурталчилгааны зардлыг анх удаа давлаа.

АНУ-ын 2026 оны Завсрын сонгуулийн сурталчилгаанд зарцуулсан хөрөнгө 12.06 тэрбум ам.долларт хүрч, улс төрийн сурталчилгааны зардлын түүхэн дээд үзүүлэлтийг шинэчиллээ. Сонгуулийн сурталчилгааны мэдээлэл судалдаг “AdImpact” компанийн арваннэгдүгээр сарын 17-нд нийтэлсэн тайлангаар уг дүн 2024 оны Ерөнхийлөгчийн сонгуулийн мөчлөгийн 11.2 тэрбум ам.долларын зардлаас найм, 2022 оны Завсрын сонгуулийнхаас 35 хувиар өндөр байна.
Харин сонгуулийн үр дүн сурталчилгаанд хамгийн их хөрөнгө зарцуулсан тал заавал ялдаггүйг харууллаа. Бүгд найрамдах намыг дэмжигч тал сурталчилгаанд 5.51 тэрбум ам.доллар зарцуулсан бол Ардчилсан намыг дэмжигчдийн зардал 5.11 тэрбум ам.доллар болжээ. Шинээр сонгогдсон Конгресс 2027 оны нэгдүгээр сард бүрэн эрхээ хэрэгжүүлж эхэлнэ.
Сонгуулийн зардал нэмэгдэхэд Конгрессын суудлын төлөөх өрсөлдөөн голлох үүрэг гүйцэтгэжээ. Сенатын сонгуулийн сурталчилгаанд 3.39, Төлөөлөгчдийн танхимын сонгуульд 2.44 тэрбум ам.доллар зарцуулсан байна. Харин мужийн амбан захирагчийн сонгуулийн сурталчилгааны зардал 2.61 тэрбум ам.долларт хүрсэн нь мөн дээд үзүүлэлт болжээ.
Сурталчилгааны санхүүжилтэд томоохон хандивлагчдын оролцоо мөн өндөр байв. “Tesla”, “SpaceX” компанийн гүйцэтгэх захирал Илон Маск 2026 оны сонгуулийн мөчлөгт 366 сая гаруй ам.доллар зориулснаар хамгийн том хувь хандивлагч болжээ. Холбооны сонгуулийн хорооны бүртгэлд хийсэн CNBC-ийн шинжилгээгээр хамгийн том 20 хандивлагч бүлгийн 14 нь Бүгд найрамдах намын нэр дэвшигчдийг дэмжсэн байна. Гэвч зарцуулсан хөрөнгийн хэмжээ болон сурталчилгааны бодит хүртээмж ижил байсангүй. “AdImpact”-ийн мэдээлэл хариуцсан ахлах дэд ерөнхийлөгч Жон Линкийн тайлбарласнаар Ардчилсан намыг дэмжсэн сурталчилгаа цацалтын тоо болон үзэгчдэд хүрсэн хэмжээгээр өрсөлдөгчөөсөө давуу эсвэл ойролцоо түвшинд байжээ. Телевизийн өргөн нэвтрүүлэг улс төрийн сурталчилгааны хамгийн том суваг хэвээр үлдсэн байна. Тус сувгаар 5.85 тэрбум ам.долларын сурталчилгаа цацсан нь нийт зардлын 49 хувьтай тэнцжээ. Үүний зэрэгцээ интернэтэд холбогдсон телевиз, стриминг төхөөрөмжийн сурталчилгаанд 2.66 тэрбум, дижитал сувгуудад 1.91 тэрбум ам.доллар зарцуулсан нь 2024 оны сонгуулийн мөчлөгөөс хоёр оронтой хувиар өссөн үзүүлэлт юм.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ





