“Huawei” АНУ-ын прокуроруудыг нотлох баримтыг гуйвуулсан хэмээн буруутгалаа
АНУ-д үргэлжилж буй Хятадын “Huawei” компанийн шүүх хурлын эцсийн шатанд өмгөөлөгчид прокуроруудын дэвшүүлсэн эрүүгийн хэргүүдийг нотолж чадаагүй хэмээн мэдэгдлээ.

АНУ-ын Нью-Йорк хотын Бруклин дүүргийн холбооны шүүхэд үргэлжилж буй Хятадын технологийн “Huawei” компанийн эрүүгийн хэргийн шүүх хурал эцсийн шатандаа ороод байна. Тус компанийн өмгөөлөгч Брайан Хеберлиг мягмар гарагт шүүх хурлын үеэр Америкийн прокурорууд “Huawei”-ийн бизнесийн үйл ажиллагааг гэмт хэргийн шинжтэй мэтээр тайлбарлаж, хоёр сарын турш үргэлжилсэн шүүх ажиллагааны явцад буруутгалаа нотолж чадаагүй гэдгийг хэлжээ. Тэрбээр прокурорууд эхлээд компанийг гэм буруутай гэж үзээд, улмаар өөрсдийн дүгнэлтэд нийцүүлэхийн тулд нотлох баримтыг гуйвуулсан хэмээн шүүмжилжээ. Мөн баримтууд анхны таамаглалтай нь нийцээгүй тохиолдолд буруутгах үндэслэлээ өөрчилсөн гэж үзэж байна. АНУ-ын прокурор Мередит Арфа даваа гарагт “Huawei” компанийг сүүлийн 20 жилийн турш Америкийн компаниуд, санхүүгийн систем болон Засгийн газрын эсрэг чиглэсэн гэмт үйл ажиллагаа явуулсан гэж мэдэгдсэн юм. Прокурорын тал компанийн гэм бурууг үндэслэл бүхий эргэлзээгүйгээр нотолсон хэмээн үзэж байгаа юм.
Иран дахь бизнес болон худалдааны нууцын маргаан АНУ-ын прокурорууд “Huawei”-ийг Иранд явуулж байсан бизнесийн үйл ажиллагааныхаа талаар Их Британийн “HSBC” болон бусад банкийг төөрөгдүүлж, залилан мэхлэхээр хуйвалдсан гэж буруутгажээ. Иран АНУ-ын хориг арга хэмжээнд хамрагддаг тул тус улсын зах зээл дэх бизнесийн харилцаа нь хэргийн гол асуудлын нэг болж байна. Түүнчлэн өмгөөлөгчийн тал прокурорууд ‘Huawei” компанийг Америкийн технологийн таван компанийн худалдааны нууцыг хулгайлахаар завдсан хэмээн буруутгаж байгааг няцаажээ. Түүний үзэж буйгаар прокурорууд цөөн тооны тусдаа үйл явдлыг сонгон авч, эдгээрийг 20 жилийн турш үргэлжилсэн зохион байгуулалттай хуйвалдаан мэтээр тайлбарласан байна.
2018 оноос эхэлсэн хэрэг шийдвэрлэх шатандаа орлоо “Huawei”-тэй холбоотой шүүхийн маргаан 2018 онд тус компанийн санхүү хариуцсан захирал, үүсгэн байгуулагчийн охин Мэн Ваньжоу Канадад АНУ-ын хүсэлтийн дагуу саатуулагдсанаар олон улсын анхаарлын төвд орсон юм. Мэн Ваньжоу 2021 онд АНУ-ын прокуроруудтай тохиролцоонд хүрч, улмаар түүнд холбогдох эрүүгийн хэргийг хэрэгсэхгүй болгосон ч “Huawei” компанийн эсрэг хэрэг үргэлжилсэн байна. Есдүгээр сард эхэлсэн шүүх хуралд прокурорын талаас 60 гаруй гэрч, өмгөөллийн талаас 15 орчим гэрч оролцжээ. Тангарагтны шүүх лхагва гарагаас зөвлөлдөж эхлэх төлөвтэй байгаа бөгөөд эцсийн шийдвэр хараахан гараагүй байна.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ




