Шөнийн цахилгааны тарифын 50 хувийн хөнгөлөлтийг цуцалжээ

Гэр хорооллын айл өрхүүдийн шөнийн цахилгаан хэрэглээнд үзүүлдэг 50 хувийн нэмэлт хөнгөлөлтийг цуцалж, тогтоосон дээд хэмжээнээс давсан цахилгааны төлбөрийг бүтнээр тооцохоор болжээ.

Эрчим хүчний зохицуулах хорооны 2026 оны 488 дугаар тогтоолоор шөнийн цахилгааны тарифын хөнгөлөлтийг арваннэгдүгээр сарын 1-нээс 2027 оны гуравдугаар сарын 31 хүртэл хэрэгжүүлэхээр зохицуулсан.

Шинэ зохицуулалтын дагуу 220 вольтын сүлжээнд холбогдсон өрхийн сарын 1,500 кВт.цаг хүртэлх шөнийн хэрэглээний төлбөрийг 100 хувь хөнгөлөх боловч энэ хэмжээнээс давсан хэрэглээнд хөнгөлөлт тооцохгүй юм. Өмнөх зохицуулалтаар бүрэн хөнгөлөх дээд хэмжээнээс илүү хэрэглэсэн цахилгааны төлбөрийг 50 хувиар хөнгөлдөг байв. Тухайлбал, 220 вольтын холболттой өрх нэг сард шөнийн цагаар 2,000 кВт.цаг цахилгаан хэрэглэвэл өмнө нь эхний 1,500 кВт.цагийг бүрэн, үлдсэн 500 кВт.цагийг 50 хувиар хөнгөлүүлдэг байжээ. Харин шинэ зохицуулалтаар үлдсэн 500 кВт.цагийн төлбөрийг бүтнээр төлөх юм.

Цахилгаан халаалттай өрхүүдийн зардал нэмэгдэх эрсдэлтэй Шөнийн тарифын хөнгөлөлт нь гэр хорооллын өрхүүдийг цахилгаан халаалт ашиглахад дэмжлэг үзүүлэх, нүүрсний хэрэглээг бууруулах замаар агаарын бохирдлыг багасгах зорилготой.

Харин бүрэн хөнгөлөх босгоос давсан хэрэглээний 50 хувийн хөнгөлөлтийг цуцалснаар цахилгаан халаалттай, хэрэглээ өндөр өрхүүдийн төлбөр нэмэгдэхээр байна. Нэмэгдэх дүн нь тухайн өрхийн хэрэглээ, холболтын хүчдэл болон мөрдөж буй тарифаас хамаарна.

Энэ бүхнээс уг өөрчлөлт өрхийн төсөв төдийгүй агаарын бохирдлыг бууруулах бодлогод ямар нөлөө үзүүлэх вэ гэсэн асуулт урган гарч байна. Шөнийн цахилгаан хэрэглээний хөнгөлөлт энэ сарын 1-нээс 2027 оны гуравдугаар сарын 31 хүртэл, өдөр бүр 21:00–09:00 цагийн хооронд үйлчилнэ. Хөнгөлөлтөд хамрагдахын тулд тухайн өрх цахилгааны төлбөрийн үлдэгдэлгүй, цагийн ялгаварт тарифт тоолууртай байх шаардлагатай.