Дэнжийн мянгад 207.9 тэрбум төгрөгөөр барих хийн дулааны станцыг Хятадын компанитай байгуулахаар боллоо

Нийслэлийн Иргэдийн Төлөөлөгчдийн Хурлын ээлжит есдүгээр хуралдаанаар Дэнжийн мянга дэд төвийн дулааны хэрэгцээг хангах “Байгалийн шингэрүүлсэн хийн түлшний хангамж, хийн эрчим хүчний эх үүсвэр” төслийн түншлэлийн гэрээ байгуулах эрхийг олгож, төлөөлөгчдийн 71 хувь нь дэмжлээ.

Ингэснээр БНХАУ-ын эрчим хүч, хийн дэд бүтцийн “China Gas Holdings Limited” группийн бүрэлдэхүүнд багтдаг, барилга угсралт, инженерийн шугам сүлжээний чиглэлээр үйл ажиллагаа эрхэлдэг “Тяньжинь Жунчан Барилга Инженеринг” ХХК-тай төр, хувийн хэвшлийн түншлэлийн гэрээ байгуулахаар болов.

Санхүүжилт ба эрсдэлийн хуваарилалт Төслийн нийт хөрөнгө оруулалт 207.9 тэрбум төгрөгөөр хэмжигдэж байна. Үүнээс 75 тэрбум төгрөг хүртэлх санхүүжилтийг 2026 онд багтаан нийслэлийн үнэт цаас үе шаттай арилжаалах замаар бүрдүүлэх зөвшөөрлийг Засгийн газраас Нийслэлийн Засаг дарга бөгөөд Улаанбаатар хотын Захирагчид олгожээ. Харин үлдэх 132.9 тэрбум төгрөгийн хөрөнгө оруулалтыг хувийн хэвшлийн тал хариуцна.

Гэрээний төсөлд тусгаснаар төслийн өртөг нэмэгдэх эрсдэл болон хийн нийлүүлэлт, логистик, барилга угсралт, ашиглалтын эрсдэлийг гүйцэтгэгч компани бүрэн хариуцах нөхцөлтэй байна. Түүнчлэн хуралдааны үеэр дэлгэцээр танилцуулсан төслийн баримт бичигт байгалийн хийн нийлүүлэлтийг эхний хоёр жилд ОХУ-аас татан авахаар тусгасан байв.

Төслийн бүтэц ба хүлээгдэж буй үр дүн Нийслэлийн Засаг даргын нэгдүгээр орлогчийн танилцуулснаар төсөл нь гурван үндсэн бүрэлдэхүүн, хоёр үе шаттай хэрэгжинэ. Эхний шатанд 58 МВт-ын хүчин чадалтай хийн дулааны станц, Цагаандаваанд шингэрүүлсэн байгалийн хий хүлээн авах, хадгалах, хийн төлөвт шилжүүлэх байгууламж болон хий дамжуулах үндсэн шугамыг барьж ашиглалтад оруулна. Дараагийн үе шатанд станцын хүчин чадлыг 93 МВт хүртэл өргөтгөхөөр төлөвлөжээ.

Төслийн ТЭЗҮ болон байгаль орчны үнэлгээнд дурдсанаар бүх шатны бүтээн байгуулалт дууссанаар дараах үзүүлэлтүүд бий болох тооцоотой байна:

• Шингэрүүлсэн байгалийн хий хадгалах багтаамж 2,000 шоо метр, хийжүүлэх хүчин чадал цагт 10,000 шоо метрт хүрч, жилд 137,000–220,000 Гкал дулаан үйлдвэрлэнэ.

• Жил бүр 22,000–36,000 тонн түүхий нүүрсний хэрэглээг орлож, PM2.5 нарийн ширхэгт тоосонцрыг 60.5 хувь, хүхэрлэг хийг 98 хувь, нүүрстөрөгчийн давхар ислийг 45.3 хувиар бууруулахын зэрэгцээ үнс, шаарын хаягдал гаргахгүй.

Уг төслийн урьдчилсан үнэлгээ, ТЭЗҮ, байгаль орчны үнэлгээг Эрчим хүчний яам, Сангийн яам, Эдийн засгийн хөгжлийн яамны саналыг тусган дэмжсэн бөгөөд тендерт санал хүлээн авах эцсийн хугацаанд зөвхөн “Тяньжинь Жунчан Барилга Инженеринг” ХХК материалаа ирүүлсэн байна.