“Disney”+“Cosm”: “Star Wars”-ийн 50 жилийн ойг бөмбөгөр дэлгэцээр "мялаана"

АНУ-ын үзвэр үйлчилгээний технологийн “Cosm” компани “The Walt Disney Company”-тай олон жилийн хугацаатай түншлэл байгуулж, 1977 онд анх нээлтээ хийсэн "Star Wars: A New Hope" бүтээлийг шинэ төрлийн бөмбөгөр дэлгэцийн орчинд үзүүлэхээр болжээ. “Cosm” болон “Disney”-ийн арваннэгдүгээр сарын 12-нд гаргасан албан ёсны мэдэгдлээр тусгай үзүүлбэр 2027 оны гуравдугаар сард АНУ-ын Лос-Анжелес, Даллас, Атланта, Детройт хотуудад эхэлнэ. Энэ нь “Star Wars” киноны 2027 оны тавдугаар сард тохиох 50 жилийн ойн арга хэмжээний нэг хэсэг юм. Талууд гэрээний үнийн дүн, орлого хуваарилах нөхцөл болон хамтын ажиллагаанд багтах бусад киноны нэрийг одоогоор нийтэд зарлаагүй байна.

“Star Wars”-ийн ертөнцөд орсон мэт мэдрэмж “Cosm” компани уг үзүүлбэрийг “Disney”, “Lucasfilm”, “Industrial Light & Magic” болон “MakeMake” студитэй хамтран боловсруулж байна. “Star Wars: A New Hope” киноны 2019 онд Disney+ үйлчилгээнд гарсан хувилбарыг ашиглах бөгөөд киног 12K-ээс дээш нягтралтай LED бөмбөгөр дэлгэцийн төв хэсэгт 16:9 дүрсний харьцаагаар үзүүлнэ. Харин дэлгэцийн эргэн тойрны дүрслэл киноны үйл явдлын дагуу өөрчлөгдөж, үзэгчдэд Татуин гараг, Алдерааны сүйрэл, Явины тулалдаан, Үхлийн од болон “Миллениум Фалкон” хөлгийн нислэгийг илүү өргөн орчинд мэдрүүлэхээр төлөвлөжээ. Энэ нь киног бүхэлд нь бөмбөгөр дэлгэцэд сунган харуулах бус, үндсэн дүрсийг хадгалж, түүнийг хүрээлсэн орчныг тусгайлан бүтээж буйгаараа онцлогтой. “Cosm Studios”-ийн дэд ерөнхийлөгч Алексис Скалис киноны 50 жилийн ойг тэмдэглэхийн зэрэгцээ үе үеийн үзэгчдэд “Star Wars”-ийн ертөнцийг шинэ хэлбэрээр мэдрүүлэхийг зорьж байгаагаа мэдэгдсэн байна.

“Disney” киноны сангаа шинэ форматаар ашиглах боломжоо өргөжүүлж байна “Star Wars: A New Hope” нь “Cosm”-ийн Shared Reality буюу үзэгчдийг хүрээлсэн дүрслэлийн орчинд хүргэх зургаа дахь киноны туршлага болох юм. Тус компани өмнө нь “Warner Bros.”-ийн дөрвөн киног ийм форматаар үзүүлсэн бөгөөд “Universal” болон “DreamWorks Animation”-тай хамтран "Shrek" бүтээлийг 2026 оны арванхоёрдугаар сард үзүүлэхээр төлөвлөсөн байна. “Disney”-ийн хувьд уг түншлэл нь өмнө нь бүтээсэн киноны сангаа уламжлалт кино театр, стриминг үйлчилгээнээс гадна тусгай үзвэрийн форматаар ашиглах шинэ суваг болж байна. Харин “Cosm”-ийн хувьд дэлхий даяар танигдсан кино бүтээлүүдийг хөтөлбөртөө нэмснээр спортын шууд дамжуулалтаас гадна кино сонирхогчдыг татах, үзвэрийн үйлчилгээгээ төрөлжүүлэх боломж аж.

Тасалбарыг ирэх оноос худалдаална Түүнчлэн “Disney” 50 жилийн ойн хүрээнд 1977 оны анхны киногоо 2027 оны хоёрдугаар сарын 19-нөөс кино театруудад дахин гаргахаар болсон байна. Энэ нь гуравдугаар сард эхлэх “Cosm”-ийн тусгай үзүүлбэрээс тусдаа арга хэмжээ юм. Ийнхүү “Star Wars”-ийн 50 жилийн ой нь киноны дахин нээлт, тусгай үзвэр, стриминг контент болон фэнүүдэд зориулсан бүтээгдэхүүнээр дамжуулан алдартай франчайз арилжааны боломжийг өргөжүүлэх томоохон арга хэмжээ болж байна.