BTS хамтлагийн “Swim” дуу Apple Music-ийн 2026 оны шилдэг дуунуудын жагсаалтад багтжээ

Өмнөд Солонгосын BTS хамтлагийн “Swim” дуу стриминг үйлчилгээний “Apple Music” платформын 2026 оны шилдэг дуунуудын жагсаалтад багтжээ. Бямба гарагт танилцуулсан оны шилдэг дуунуудын жагсаалтад K-pop урсгалаас багтсан цорын ганц хамтлаг BTS болсон байна.

“Swim” дуу мөн “Apple Music”-ийн “Best of 2026” цувралын хүрээнд гаргасан “A-List Pop”, “Viral Hits” болон “Kpopwrld” дууны жагсаалтад багтжээ. Тус платформ BTS-ийн “Arirang” цомгийг 2026 оны хамгийн их хүлээлт үүсгэсэн K-pop урсгалын цомгийн нэгээр тодорхойлж, хамтлаг энэ онд салбарынхаа хөгжмийн чиг хандлагыг шинэчлэн тодорхойлоход хувь нэмэр оруулсныг онцолсон байна.

“Arirang” цомог Billboard-ийн жагсаалтад 33 долоо хоног дараалан багтжээ BTS-ийн “Arirang” цомог гарснаасаа хойш бараг найман сарын хугацаанд АНУ-ын “Billboard” жагсаалтуудад эрэмблэгдсээр байна. Тодруулбал, тус цомог арваннэгдүгээр сарын 14-ний өдрөөр огноолсон “Billboard 200” жагсаалтын 62 дугаарт бичигдсэнээр 33 дахь долоо хоногтоо дараалан эрэмбэлэгджээ.

“Arirang” цомог дөрөвдүгээр сарын 4-ний жагсаалтад анх тэргүүлж, гурван долоо хоног дараалан нэгдүгээр байраа хадгалсан юм. Мөн “Top Album Sales” жагсаалтын 24 дүгээр байрт бичигдсэн бол BTS хамтлаг “Adult Contemporary” жагсаалтын 30 дугаарт эрэмбэлэгдсэн байна.

Харин “Swim” дуу “Billboard Global 200” жагсаалтад таван байр ахиж, 28 дугаарт хүрчээ. Түүнчлэн АНУ-аас бусад зах зээлийн үзүүлэлтийг хамардаг “Billboard Global Excl. US” жагсаалтын 14 дүгээр байрт бичигдсэн бол цомгийн өөр нэг дуу болох “Normal” тус жагсаалтын 114 дүгээр байрт орсон байна.

BTS-ийн аялан тоглолт Азид үргэлжилнэ BTS хамтлаг дөрөвдүгээр сард Өмнөд Солонгосын Гояан хотоос эхлүүлсэн “Arirang” дэлхийн аялан тоглолтынхоо Өмнөд Америк дахь хэсгийг саяхан өндөрлүүлжээ.

Хамтлаг арваннэгдүгээр сарын 19-нд Тайванийн Гаошюн хотод тоглож, улмаар Тайландын Бангкок, Малайзын Куала-Лумпур, Сингапур болон Индонезийн Жакарта хотуудад аялан тоглолтоо үргэлжлүүлэхээр төлөвлөсөн байна.