Гүйх гэж гараад дурлаад ирвэл яах вэ? Залуус заяаны ханиа зам дээрээс хайж байна

Өмнө нь шинэ хүнтэй танилцахын тулд баар орох, болзооны аппликейшн ашиглах нь түгээмэл байсан бол одоо Z үеийнхэн пүүзээ үдээд гүйхийг илүүд үзэх болжээ. Өөрөөр хэлбэл, өглөөний гүйлт зөвхөн эрүүл мэнддээ анхаарах цаг биш, ирээдүйн хайртай хүнтэйгээ танилцах боломж ч болж хувирч байна.

Энэ хандлага тоон мэдээллүүдээс ч тодорхой харагдаж буй. Спортын “Strava” платформын судалгаагаар Z үеийнхэн ижил сонирхолтой хүмүүстэй танилцахын тулд спортоор хичээллэх магадлал X үеийнхнээс 39 хувиар өндөр байжээ. Түүнчлэн Z үеийнхний бараг 20 хувь нь спортоор хичээллэх явцдаа танилцсан хүнтэйгээ болзоонд явж үзсэн гэж хариулсан байна.

Залуусын сонирхлыг дагаад гүйлтийн арга хэмжээнүүд ч улам өргөжиж байна. Тухайлбал, Нью-Йоркт зохион байгуулсан DJ Диплогийн таван километрийн гүйлт, хөгжмийн фестиваль хосолсон арга хэмжээнд 12,000 орчим хүн оролцжээ. Оролцогчид гүйж, хөгжим сонсож, шинэ хүмүүстэй танилцах боломжтой бөгөөд тасалбарын үнэ 70–250 ам.долларын хооронд байв.

Харин “Hyrox” фитнесийн тэмцээн болзооны “Surf Dating” аппликейшнтэй хамтран бүр ч сонирхолтой санаа хэрэгжүүлжээ. Тэд анх удаа болзож буй хүмүүсийг нэг баг болгон тэмцээнд оролцуулж, кофе ууж суухын оронд хамтдаа дасгал хийж, нэгнээ таньж мэдэх боломж бүрдүүлсэн байна.

Энэхүү өөрчлөлт спортын бизнесүүдэд ч ашигтай тусаж байна. Сонирхогчдын спортын лиг зохион байгуулдаг “Volo Sports” компанийн оролцогчдын бүртгэл 2025 онд 710,000 байсан бол 2026 онд 950,000 хүрэх төлөвтэй байгаа нь 34 орчим хувийн өсөлт юм.

Ийнхүү Z үеийнхний хувьд гүйлтийн клуб нь зөвхөн дасгал хийдэг газар биш, ижил сонирхолтой хүмүүстэй уулзаж, шинэ нөхөрлөл, магадгүй хайр дурлалын түүхээ эхлүүлэх орчин болжээ. Тэгэхээр дараагийн удаа гүйхээр гарахдаа хэн нэгэнтэй мөр зэрэгцэн гүйж, зүрхний цохилтоо зөвхөн дасгалаас болж хурдасгахгүй ч байж мэдэх нь.