Хонконг руу электрон тамхи авч орвол 2 сая хүртэл хонконг доллароор торгуулах эрсдэлтэй
Хонконгийн хилээр электрон болон халаадаг тамхи зэрэг уламжлалт янжуураас өөр төрлийн тамхины бүтээгдэхүүн авч нэвтрүүлэхэд хатуу хязгаарлалт үйлчилж байна.
Хонконг руу зорчих Монгол Улсын иргэдэд тамхи, электрон тамхи болон тамхи татах зориулалттай зарим хэрэгслийг хилээр нэвтрүүлэхтэй холбоотой хязгаарлалтыг албаныхан анхааруулжээ.
Монгол Улсаас БНХАУ-ын Засаг захиргааны онцгой бүс Хонконгод суугаа Ерөнхий консулын газар зорчигчдыг ачаа тээшиндээ авч явах тамхины бүтээгдэхүүн, хэрэгслийн төрлийг урьдчилан нягтлахыг зөвлөсөн байна.
Хонконгод электрон болон халаадаг тамхи, тэдгээртэй холбоотой зарим бүтээгдэхүүнийг импортлохыг хориглосон зохицуулалт үйлчилдэг. Энэхүү хориг нь хувийн хэрэглээнд зориулан авч яваа бүтээгдэхүүнд ч хамаарах тул зорчигчид худалдаалах зорилгогүй байсан ч гаалийн шаардлагыг мөрдөх ёстойг албаныхан анхаарууллаа.
Харин энгийн янжуур болон уламжлалт тамхины зарим бүтээгдэхүүнийг бүхэлд нь хориглоогүй бөгөөд гаалийн татвар, зөвшөөрөгдөх тоо хэмжээтэй холбоотой тусгай журам мөрдөгддөг.
Иймээс зорчигчид электрон тамхи, халаадаг тамхины төхөөрөмж, дагалдах бүтээгдэхүүн болон энгийн янжуурыг нэг ангилалд хамааруулалгүй, тус бүрийн шаардлагыг шалгах хэрэгтэй аж.
Хонконгийн хилээр нэвтрэх үед хориглосон бүтээгдэхүүн илэрвэл холбогдох хууль тогтоомжийн дагуу хураах, хариуцлага тооцдог байна.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ
