“Nvidia”-ийн чипийн хэрэгт нэр холбогдсон Алис Хуангийг Сингапурт дахин нэвтрэхийг хоригложээ

Сингапурын эрх баригчид дэвшилтэт хиймэл оюуны чип агуулсан серверүүдийг гуравдагч улс руу хууль бусаар дамжуулсан байж болзошгүй хэргийг үргэлжлүүлэн шалгаж, “Megaspeed International” компанийн удирдлагад ажиллаж байсан Алис Хуангийг тус улсад дахин нэвтрэхийг хориглосон тухай мэдээлжээ. Мөрдөн шалгах ажиллагааны хүрээнд баасан гарагт тав дахь этгээдийг компьютерын серверийн худалдаатай холбоотой залилангийн 41 зүйл ангиар яллагдагчаар татсан байна. Прокурорууд шалгалтад хамрагдсан гүйлгээний нийт дүнг ойролцоогоор 390 сая ам.доллар гэж мэдээлжээ. Сингапурын эрх баригчдын мэдээлснээр Алис Хуангтай холбоотой шалгасан мэдүүлгүүдээс эрүүгийн хэрэгт буруутгах хангалттай нотлох баримт тогтоогдоогүй байна. Гэхдээ түүнийг мөрдөн шалгах ажиллагаанд өөрийн оролцоог бодит байдлаас бага юм шигээр тайлбарласан гэж үзсэн тухай мэдээлжээ.

Серверүүдийн эцсийн хүлээн авагчийг тогтоохоор шалгаж байна 2025 оны хоёрдугаар сард эхэлсэн мөрдөн шалгах ажиллагаа нь “Megaspeed International” болон түүнтэй холбоотой албан тушаалтнуудын серверийн худалдаа, экспортын үйл ажиллагааг хамарч байна.

Эрх баригчид Сингапураар дамжин Малайз руу экспортолсон серверүүдийг анх мэдүүлсэн хүлээн авагчаас өөр этгээдэд шилжүүлсэн эсэхийг тогтоохоор ажиллаж байгаа аж.

Хэрэв өндөр хүчин чадалтай хиймэл оюуны чип агуулсан серверүүдийг экспортын хяналтад хамаарах эцсийн хэрэглэгчид дамжуулсан нь тогтоогдвол холбогдох худалдааны сүлжээний хууль ёсны байдал, хариуцлагын асуудал үүсэх юм.

Гэхдээ серверүүдийн эцсийн хүлээн авагч хэн байсан, тэдгээрийг экспортын хяналтыг зөрчин шилжүүлсэн эсэхийг мөрдөн шалгах ажиллагаагаар эцэслэн тогтоох аж.

АНУ болон компаниудын мэдээлэл солилцоо хангалтгүй байгааг онцолжээ Сингапурын Дотоод хэргийн яам АНУ-ын эрх бүхий байгууллагуудаас мөрдөн шалгах ажиллагаанд үзүүлсэн мэдээлэл, тусламж хязгаарлагдмал байсныг мэдэгджээ.

Мөн Сингапурын цагдаагийн байгууллага сервер үйлдвэрлэгч “Super Micro Computer”-ээс мэдээлэл хүссэн ч тус компанийн хамтын ажиллагаа хязгаарлагдмал байсан гэж дурдсан байна.

Элвин Камын тайлбарласнаар барааны худалдааны урсгал, санхүүгийн гүйлгээ болон компаниудын эзэмшлийн мэдээллийг харилцан уялдуулан шалгахад хүндрэлтэй байгаа аж.

Энэ нь өндөр технологийн бүтээгдэхүүнийг олон улсын дамжин өнгөрүүлэх худалдаагаар нийлүүлэх үед эцсийн хэрэглэгчийг тогтоох, экспортын хяналтыг хэрэгжүүлэхэд тулгардаг сорилтыг харуулж байна.

“Nvidia”-ийн Сингапуртай холбоотой орлого нэмэгджээ “Nvidia”-ийн Сингапуртай холбоотой орлого 2025 оны долдугаар сард дууссан санхүүгийн жил нийт орлогын 22 хувийг эзэлсэн нь 2023 оны 8 хувиас өссөн үзүүлэлт болжээ.

Гэхдээ компанийн орлогыг харилцагчийн бүртгэлтэй улсаар ангилсан үзүүлэлт нь бүтээгдэхүүний эцсийн хэрэглээний байршилтай заавал давхцахгүй. Тиймээс Сингапуртай холбоотой орлогын хэмжээ өссөн нь экспортын хяналтыг зөрчсөн гүйлгээ нэмэгдсэнийг нотлохгүй юм.