"Muse" туслах хэрэглэгчийн өмнөөс байгууллагуудтай утсаар ярьдаг боллоо

“Meta” компани хэрэглэгчийн өмнөөс бизнесийн байгууллагууд руу утсаар залгаж, тодорхой хүсэлт дамжуулах боломжтой “Muse” хиймэл оюуны агентын үйлчилгээгээ АНУ-д өргөжүүлжээ. Есдүгээр сард хязгаарлагдмал хүрээнд туршиж эхэлсэн уг боломжийг одоо төлбөртэй бүх хэрэглэгч ашиглах боломжтой болсон байна.

Тус компанийн өнгөрсөн сард мэдээлснээр “Muse” хиймэл оюуны агент 10 сая гаруй хэрэглэгчтэй болжээ. “Meta” энэхүү үйлчилгээг өдөр тутмын ажлыг хөнгөвчлөх хэрэгсэл болгон хөгжүүлэхийг зорьж байгаа бөгөөд хэрэглэгчийн өмнөөс утсаар ярих боломж нь уг стратегийн нэг хэсэг юм.

“Meta”-ийн хиймэл оюун хариуцсан захирал, “Superintelligence Labs” нэгжийн тэргүүн Александер Вангийн тайлбарласнаар хэрэглэгчид кабелийн телевизийн үйлчилгээ үзүүлэгчтэй холбогдох, төрийн үйлчилгээний байгууллагаас мэдээлэл авах, цахим захиалгын системгүй ресторанд ширээ захиалах зэрэг ажлыг хиймэл оюунд даатгах боломжтой.

Одоогоор “Muse”-ийн сарын 20 ам.долларын багц долоо хоногт 500 сая токен ашиглах эрхтэй бол сарын 100 ам.долларын багц 3 тэрбум токены эрх олгож байна. Токен нь хиймэл оюуны боловсруулж буй мэдээллийн хэмжээг тооцох нэгж юм.

Хиймэл оюуны дуудлагыг байгууллагууд хүлээн авах уу? Хэрэглэгчийн өмнөөс утсаар ярих боломжийг зөвхөн “Meta” хөгжүүлээгүй. “Google”-ийн “Gemini” болон “Instinct” стартап мөн ижил төрлийн үйлчилгээ санал болгож байгаа юм.

Гэхдээ хиймэл оюуны агентууд техникийн хувьд утсаар ярих чадвартай болсон ч бодит хэрэглээнд тодорхой хүндрэл тулгарч байна. Тухайлбал, зарим байгууллага болон хүлээн авах ажилтнууд хүн бус хиймэл оюун залгаж байгааг мэдмэгцээ дуудлагыг тасалдаг аж.

Нөгөө талаас, хиймэл оюуны дуу хоолой хүний яриатай улам төстэй болж байгаа нь байгууллагуудын хувьд жинхэнэ хэрэглэгч болон түүний өмнөөс ажиллаж буй хиймэл оюуныг ялгахад хүндрэл учруулж буй.

Хэрэглэгчийн үйлчилгээний хүлээлтийг багасгах боломж Хэрэглэгчид үйлчилгээний байгууллагатай утсаар холбогдохдоо автомат цэсээр дамжих, оператор хүлээх, нэг хэлтсээс нөгөөд шилжих зэрэгт багагүй хугацаа зарцуулдаг. Хиймэл оюуны агентууд ийм давтагддаг ажлыг хэрэглэгчийн оронд гүйцэтгэснээр цаг хэмнэх боломжтой.

Гэхдээ үйлчилгээний байгууллагууд хиймэл оюуны дуудлагыг хэр өргөн хүрээнд хүлээн авах, агентууд хэрэглэгчийн хүсэлтийг хэр найдвартай биелүүлэх нь цаашдын хэрэглээг тодорхойлох гол хүчин зүйлсийн нэг байх юм.

Үүний зэрэгцээ “Muse”-ийн утсаар залгах боломж төлбөртэй хэрэглэгчдэд хязгаарлагдсан хэвээр байгаа ч хиймэл оюуны агентдаа зориулсан цахим шуудангийн хаяг үүсгэх боломжийг удахгүй үнэгүй хэрэглэгчдэд нээхээр төлөвлөж байгааг Александер Ванг мэдээлжээ.