Алис Хуанаас “Huawei” хүртэл: Хувийн тагнуулын компани технологийн салбарын бизнесийн холбоосыг илрүүлжээ

АНУ-ын хувийн тагнуул, эрсдэлийн судалгааны “Tesari” компани “Nvidia”-ийн гүйцэтгэх захирал Женсен Хуангтай холбоотой асуудлаар анхаарлын төвд ороод буй бизнес эрхлэгч Алис Хуаны бизнесийн сүлжээ болон БНХАУ-ын технологийн “Huawei” компанийн хоорондын боломжит холбоог судалжээ.

CNBC-д танилцуулсан судалгаанд БНХАУ-ын бүртгэл тус компанийн бүртгэл, эзэмшлийн мэдээлэл болон хэвлэлүүдийн нийтлэлд тулгуурлан Алис Хуаны оролцож байсан бизнесүүдийг дата төвийн хөрөнгө оруулалт, үүлэн тооцооллын үйлчилгээтэй холбон авч үзсэн байна.

Судалгаагаар Алис Хуан буюу Хуан Лэ 2019 онд өөрийн “Osmanthus” үүлэн тооцооллын бизнесийг “7Road” компанид худалдсан гэж мэдээлжээ. Улмаар “7Road”-ийн Сингапур дахь охин компанийн үйл ажиллагаанаас 2023 онд “Megaspeed” тусгаарлагдсан байна.

“The Information”-ийн мэдээлснээр “Megaspeed” нь БНХАУ-ын компаниудад дор хаяж 7.5 тэрбум ам.долларын үнэ бүхий “Nvidia”-ийн чип нийлүүлэхэд зуучилсан байж болзошгүй аж.

“Huawei Cloud”-тай холбогдох эзэмшлийн сүлжээ “Tesari”-ийн судалгаанд дурдсанаар Алис Хуан 2016 оноос “Shanghai Hexi” компанийн хамтран эзэмшигч байжээ. Тус компани 2021 онд “Shanghai Century Longteng”-ийн 27 хувийг худалдан авсан байна.

Харин “Shanghai Century Longteng” нь Шэньжэнь хотод байрлах “Shenzhen Yifeng Technology” дата төвийн бизнесийн 50.1 хувийг эзэмшдэг гэж судалгаанд дурджээ. Уг дата төвийн гол хэрэглэгчдийн нэг нь “Huawei”-ийн үүлэн тооцооллын үйлчилгээ эрхэлдэг “Huawei Cloud” байсан аж.
“Shanghai Hexi” нь уг дата төвийн санхүүжилттэй холбоотой зээлийн баталгаа гаргасан гэж судалгаанд дурдсан байна. Гэвч санхүүжилтийн холбоо нь “Nvidia”-ийн график боловсруулах процессорыг худалдан авсан, дамжуулсан эсвэл экспортын хязгаарлалт зөрчсөн гэсэн үг биш юм.

Алис Хуаны нөхөр Кан Вэй “Shanghai Hexi”-ийг үүсгэн байгуулж, 2022 онд “Shanghai Century Longteng”-ийн удирдлагад орсон тухай мөн мэдээлжээ. Тэрбээр “Huawei”-тай байгуулсан гэрээний гарын үсэг зурах ёслолд оролцсон гэх мэдээлэл байгаа ч гэрээний нөхцөл, хамрах хүрээ болон чипийн нийлүүлэлттэй холбоотой эсэх нь тодорхойгүй байна.

АНУ-ын чипийн экспортын хязгаарлалттай холбоотой эрсдэл Энэхүү мэдээлэл нь АНУ-ын өндөр хүчин чадалтай хиймэл оюуны чипийн экспортод тавьсан хязгаарлалт, технологийн нийлүүлэлтийн сүлжээний ил тод байдалтай холбоотой асуудлыг хөндөж байна.

“Tesari”-ийн Брайан Андерсен Алис Хуаны бизнесийн сүлжээнд илэрсэн холбоосуудыг үндэсний аюулгүй байдал болон технологийн тархалтаас сэргийлэх хяналтын хүрээнд нягтлах шаардлагатай гэж үзжээ.

Гэхдээ компанийн эзэмшил, дата төвийн санхүүжилт, үүлэн тооцооллын үйлчилгээний харилцаа нь хууль бус үйл ажиллагааны нотолгоо болохгүй. Үүнийг тогтоохын тулд бодит чипийн нийлүүлэлтийн гэрээ, төлбөрийн баримт, төхөөрөмжийн байршил, эцсийн хэрэглэгчийн мэдээлэл шаардлагатай юм.