Засгийн газарт шилжүүлсэн 73 өргөдөл, гомдлын дөрөвний нэгийг шийдвэрлэжээ

УИХ-ын Өргөдлийн байнгын хороо өнөөдрийн хуралдаанаараа иргэд, хуулийн этгээдээс ирүүлсэн өргөдөл, гомдлыг Засгийн газрын байгууллагууд хэрхэн шийдвэрлэж байгаа тухай мэдээллийг хүргэлээ. УИХ-аас холбогдох байгууллагуудад шилжүүлсэн нийт 73 өргөдөл, гомдлын 24.7 хувийг шийдвэрлэсэн бол 65.8 хувь нь шийдвэрлэх шатанд байгааг Засгийн газрын Хэрэг эрхлэх газрын дарга Б.Энхбаяр танилцуулав.

Тодруулбал, 2025 оны есдүгээр сарын 10-наас 2026 оны аравдугаар сарын 13-ны хооронд УИХ-ын дарга, Өргөдлийн болон Хууль зүйн байнгын хороонд ирүүлсэн 73 өргөдөл, гомдлыг Засгийн газрын 18 байгууллага, албан тушаалтанд шилжүүлжээ.

Эдгээр өргөдөл, гомдолд орон сууцны захиалга, залилангийн улмаас учирсан хохирлыг барагдуулах, тэтгэвэр, тэтгэмжийн зөрүүг арилгах, тэтгэврийн итгэлцүүрийн тооцооллыг жигдлэх, төрийн байгууллага, албан хаагчийн үйл ажиллагаатай холбоотой асуудлууд багтсан байна. Мөн хууль эрх зүйн зохицуулалт, санхүүгийн дэмжлэг, хэрэг зөрчилтэй холбоотой өргөдлүүд иржээ.

Орон сууцны захиалгатай холбоотой 870 гаруй гомдлыг шалгаж байна Иргэдээс ирүүлсэн өргөдөл, гомдлын дийлэнх нь орон сууцтай холбоотой байгаа тул Ерөнхий сайдын 2026 оны 154 дүгээр захирамжаар Хууль зүй, дотоод хэргийн сайдаар ахлуулсан ажлын хэсэг байгуулжээ.

Тус ажлын хэсэг орон сууцны захиалгын гэрээний улмаас хохирсон иргэдийн хууль ёсны эрх ашгийг хамгаалах, холбогдох асуудлыг шалгаж шийдвэрлэх үүрэгтэй бөгөөд одоогоор 870 гаруй өргөдөл, гомдлыг хүлээн авч, шалгаж байгаа аж.

Ингэснээр орон сууцны захиалгын гэрээтэй холбоотой маргаан, иргэдийн хохирлыг барагдуулах асуудлыг Засгийн газрын түвшинд тусгайлан авч үзэж эхэлсэн байна. Гэхдээ ажлын хэсэгт ирүүлсэн өргөдлүүдээс хэдийг шийдвэрлэсэн, хэчнээн иргэний хохирлыг барагдуулсан талаар тодорхой мэдээлээгүй байна.