Чингис хааны хөргийг архи, тамхины савлагаанд ашиглахыг хориглох хуулийн төсөл боловсруулна

УИХ-ын намрын чуулганы өнөөдрийн хуралдаанаар “Их Монгол Улс байгуулагдсаны 820 жилийн ойг тохиолдуулан Их эзэн Чингис хааны төрт ёсны өв уламжлалыг дээдлэн мөнхжүүлэх тухай” тогтоолыг баталлаа.

Тогтоолын хүрээнд Их Монгол Улсын түүх, соёлын өвийг хамгаалах, судалгааны бүтээлүүдийг дэмжих, Чингис хааны нэр, хөрөг болон түүхэн бэлгэдлийн ашиглалтыг зохицуулахтай холбоотой таван чиглэлийн арга хэмжээ авахыг Засгийн газарт даалгажээ.

Үүний нэг нь Их эзэн Чингис хааны эш хөргийг согтууруулах ундаа болон тамхины сав баглаа боодолд аливаа хэлбэрээр ашиглахыг хориглох хуулийн төсөл боловсруулах асуудал юм.

Чингис хааны нэрээр нэрлэгдсэн бүтээгдэхүүний татвараас санхүүжих сан байгуулах санал боловсруулна

Тогтоолд Их эзэн Чингис хааны нэрээр нэрлэгдсэн бараа, бүтээгдэхүүний онцгой албан татварын тодорхой хувиар санхүүжих сан байгуулах боломжийг судалж, санал боловсруулахаар тусгажээ.

Уг сангийн хөрөнгийг Чингис хааны нэр төр, түүхэн үйл хэрэг болон Их Монгол Улсын түүхийг хамгаалах, сурталчлах үйл ажиллагаанд зарцуулах зорилготой аж.

Гэхдээ сангийн хөрөнгийн эх үүсвэр болох татварын хувь хэмжээ, санхүүжилтийн механизм болон зарцуулалтын нарийвчилсан зохицуулалтыг одоогоор тогтоогоогүй бөгөөд Засгийн газар санал боловсруулан УИХ-д танилцуулах юм.

Мөн Монголын төрт ёсны түүх, археологи, угсаатны зүйн судалгаа, кино, урлаг, соёлын бүтээл болон холбогдох арга хэмжээнээс олох орлогыг татвараас чөлөөлөх тухай хууль тогтоомжийн төсөл боловсруулахыг даалгажээ.

Эдгээр зохицуулалт батлагдвал түүх, соёлын судалгаа, бүтээл үйлдвэрлэл болон соёлын салбарын санхүүжилтэд нөлөөлнө гэж албаныхан үзэж байна.

Гадаадад буй Монголын түүхийн эх сурвалжийг судална

Тогтоолоор Их Монгол Улсын түүхтэй холбоотой үйл явдал, түүх, соёлын дурсгалт газруудыг шинээр олж тогтоох, хамгаалах, нөхөн сэргээх ажлыг эрчимжүүлэхээр болжээ. Мөн Чингис хааны үйл хэрэг, Их Монгол Улсын үүсэл, хөгжилтэй холбоотой бичмэл эх сурвалж, археологи, угсаатны зүйн судалгааны бүтээлүүдийг хэвлэн нийтлэх, олон нийтэд сурталчлах ажлыг дэмжих аж.

Гадаадын орнуудад хадгалагдаж буй Монголын түүхийн бичмэл эх сурвалжуудыг олж тогтоох, эх хувь болон хуулбарыг нь татан авах, Монгол Улсын түүхийн сан хөмрөгт бүртгэн судалгааны эргэлтэд оруулах арга хэмжээ авахаар тусгасан байна.

Мөн Чингис хааны нэр төр, эш хөрөг, гэрэгэ, “Монголын нууц товчоо” болон Их Монгол Улсын түүхэн бэлгэдлийг ашиглахтай холбоотой эрх зүйн зохицуулалтыг боловсронгуй болгохоор төлөвлөжээ.

Их Монгол Улс байгуулагдсаны 820 жилийн ойд зориулсан УИХ-ын хүндэтгэлийн хуралдааныг арваннэгдүгээр сарын 10-нд зохион байгуулахаар товлосон байна.