Японы Төв банк ойрын хугацаанд 2 хувь хүртэл өсгөж магадгүй байна

Японы Төв банк инфляцын өсөлтийг хазаарлахын тулд арванхоёрдугаар сарын 17–18-ны мөнгөний бодлогын хурлаар бодлогын хүүгээ 1.5 хувьд хүргэж, улмаар 2027 онд улирал тутамд нэг удаа нэмэгдүүлснээр 2 хувьд хүргэж магадгүй байна. Энэ талаар Төв банкны ахлах эдийн засагч асан, өдгөө Японы судалгааны “Sompo Institute Plus” байгууллагад ажиллаж буй Сэйсаку Камэда “Reuters” агентлагт ярьжээ. Баасан гарагийн арилжаагаар хиймэл оюуны дата төвийн дэд бүтэцтэй холбоотой болгоомжлол нэмэгдсэнээр дэлхийн хөрөнгийн зах зээл огцом уналтад орж, 2.5 их наяд ам.доллар арчигдаад буй. Үүний улмаас Японы технологийн эд анги нийлүүлэгч компаниудын хувьцааны ханш огцом унаад буй. Сэйсаку Камэдагийн үзэж буйгаар хэрэв зах зээлийн “коррекц” буюу засвар хөдөлгөөн ирэх хурлын өмнө намжвал Төв банк нөхцөл байдлын “тур зуурынх” хэмээн үнэлэн бодлогын хүү өсгөхөөр байгаа юм. Харин хиймэл оюуны салбарын өсөлт огцом саарч, улмаар АНУ-ын эдийн засаг огцом агшин, Японы эдийн засагт “ноцтой” сөрөг нөлөө үзүүлбэл Төв банк хүүгээ нэмэгдүүлэхээ түр зогсоож болзошгүй ажээ.

Бодлогын хүүгийн өсөлт 2027 онд үргэлжилж болзошгүй Камэдагийн үзэж буйгаар Японы Төв банк инфляцын өсөлтөд хэт болгоомжтой хандаж, бодлогын хүүгээ нэмэгдүүлэх шийдвэрийг удаашруулж иржээ. Инфляцыг хэмждэг гол үзүүлэлтүүдийн дийлэнх нь өмнө нь 2 хувьд хүрсэн ч үнийн өсөлт энэ түвшинд тогтвортой хадгалагдах эсэхэд Төв банк эргэлзэж байсан аж. Харин зургадугаар болон есдүгээр сард бодлогын хүүгээ нэмэгдүүлсэн нь Төв банк инфляцын эсрэг илүү идэвхтэй арга хэмжээ авч эхэлснийг харуулж байна гэж Камэда дүгнэжээ. Түүний тайлбарласнаар Японы компаниудын ашиг өндөр хэвээр байгаа бөгөөд хүнсний бүтээгдэхүүний татварыг бууруулахаар төлөвлөсөн нь иргэдийн худалдан авах чадварыг дэмжих боломжтой аж. Иймээс бодлогын хүүг үргэлжлүүлэн нэмэгдүүлсэн ч Японы эдийн засагт үзүүлэх сөрөг нөлөө харьцангуй бага байх төлөвтэй байна. Харин хөрөнгийн зах зээлийн тогтворгүй байдал үргэлжилбэл дараагийн хүүгийн өсөлтийг 2027 оны нэгдүгээр сар хүртэл хойшлуулж магадгүй юм. Гэсэн хэдий ч Японы Төв банк цаашид ойролцоогоор гурван сар тутамд бодлогын хүүгээ нэмэгдүүлж, эцэст нь 2 хувьд хүргэнэ гэж Камэда таамаглажээ.