Шатахууны импортыг нэмэгдүүлэхээр төлөвлөсөн ч ачаа эргэлт нийлүүлэлтийг саатуулж байна

Монгол Улс арваннэгдүгээр сард дөрвөн улсаас нийт 93 мянган тонн шатахуун импортлохоор захиалга баталгаажуулсан ч тээвэрлэлт, хадгалалт болон вагон эргэлтийн хүндрэл шатахууны нийлүүлэлтэд нөлөөлсөөр байгааг албаныхан өгүүллээ.

Аж үйлдвэр, эрдэс баялгийн дэд сайд Б.Мөнхтамир ОХУ-аас 70 мянга, БНСУ-аас 12 мянга, БНХАУ-аас 8,000 тонн, Казахстанаас 3,000 тонн шатахуун импортлохоор төлөвлөжээ. Нэмэлт хэлэлцээрүүд амжилттай болбол энэ сарын импортын хэмжээг 100 мянган тоннд хүргэх боломжтой гэж салбарын яамнаас мэдээлсэн байна.

ОХУ-аас захиалсан 57 мянган тонн шатахууны нийлүүлэлт дуусах шатандаа оржээ

Аравдугаар сард ОХУ-ын “Роснефть” компанийн Ангарскийн газрын тос боловсруулах үйлдвэрээс дээрх хэмжээний шатахууныг нийлүүлэхээр захиалсан байна.

Уг захиалгын 56.6 мянга орчим тонныг ачсан бөгөөд үлдсэн 400 тонныг нийлүүлэх шаардлагатай байгаа аж.

Мөн аравдугаар сард ОХУ болон БНХАУ-аас нийт 67 мянган тонн шатахуун импортолсон талаар мэдээлжээ.

Тэрбээр ОХУ-ын төмөр замын тээвэрлэлтийн зохион байгуулалттай холбоотойгоор Евро-92 бензиний тээвэрлэлт хоёр хоног саатсан нь дотоодын нийлүүлэлтэд нөлөөлснийг тайлбарласан байна.

Төмөр замд 1,500 орчим шатахуунтай вагон бөөгнөрчээ

Шатахууны шуурхай штабын мэдээлснээр Улаанбаатар төмөр замын сүлжээнд шатахуунтай 1,500 орчим вагон байгаа бөгөөд эдгээрийн дийлэнх нь дизель түлш аж.

Арав, арваннэгдүгээр сар бол зуны дизель түлшнээс өвлийн түлшинд шилжих үе тул уул уурхай, тээврийн компаниуд өвлийн түлшний нөөцөө татан авдаг. Энэ нь төмөр замын ачааллыг нэмэгдүүлж байгааг дэд сайд тайлбарлажээ.

Мөн ОХУ-ын нутаг дэвсгэрээс Монгол Улсыг чиглэн 218 галт тэрэг шатахуун тээвэрлэгдэж байгаа нь зургаан өдрийн хэрэглээтэй тэнцэх хэмжээ аж.

Харин аж ахуйн нэгжүүд зориудаар вагон саатуулж, шатахууны зохиомол хомсдол үүсгэж байгаа гэх мэдээллийг дэд сайд үгүйсгэсэн байна.

Түүний тайлбарласнаар АИ-92, Евро-92 болон АИ-95 бензинийг Сүхбаатар өртөөгөөр дамжуулан Толгойт, Рашаант өртөөнд буулгасны дараа шатахуун түгээх станцууд руу хүргэж байгаа аж.

БНСУ-аас импортлох бензиний үнэ 4,900–5,600 төгрөгийн хооронд байх төлөвтэй

Шатахууны импортын эх үүсвэрийг нэмэгдүүлэх хүрээнд “Аргал Ойл” ХХК БНСУ-аас 10–12 мянган тонн Евро-92 бензин импортлох гэрээ байгуулжээ.

Шатахууныг усан онгоцоор БНХАУ-ын Цинхуандао боомтод хүргэсэн бөгөөд тэндээс төмөр замаар Замын-Үүдийн боомтоор дамжуулан Монгол Улсад нийлүүлэхээр төлөвлөж, арваннэгдүгээр сарын дундаас эхлүүлэхээр тооцоолжээ.

Импортолсон бүтээгдэхүүнийг “Аргал Ойл” компанийн салбаруудаас гадна “Магнай Трейд” ХХК-ийн төвийн болон баруун аймгууд дахь шатахуун түгээх станцуудаар борлуулах юм.

Харин БНХАУ-аас импортолсон АИ-92 бензин литр нь 5,600 төгрөг, ОХУ-аас импортолсон бензин 4,900 төгрөгийн үнэтэй байгаа аж. Шатахуун түгээх станцууд энгийн АИ-92 бензинийг Евро-5 стандартын бензин нэрээр борлуулж байгаа гэх хардлагын талаар дэд сайд Б.Мөнхтамир тайлбар өгөхдөө хоёр төрлийн бензинийг тусдаа сав, түгээгүүрээр борлуулдаг бөгөөд Ашигт малтмал, газрын тосны газар шатахуун түгээх станцуудаас долоо хоногт хоёр удаа түүвэрчилсэн дээж авч, чанарын шинжилгээ хийж байгаа аж. Одоогоор хяналт шалгалтаар зөрчил илрээгүй гэж тэрбээр мэдэгдсэн байна. Гэхдээ шатахууны чанар, хүхрийн агууламж болон стандартын шаардлагыг бодитоор хангаж байгаа эсэхийг лабораторийн шинжилгээний дүнгээр тогтоох боломжтой.