АНУ-ын завсрын сонгуулийн дараа алтны ханш 2 хувиар өсч, 4,000 ам.доллар давлаа

АНУ-ын завсрын сонгуулийн дараа ам.долларын ханш суларч, үнэт металлын зах зээлд алтны ханш огцом өслөө. Арваннэгдүгээр сарын 4-ний Азийн арилжааны үеэр спот алтны ханш 2.2 хувиар өсч, унц тутамдаа 4,016.01 ам.долларт хүрснийг “Reuters” мэдээлэв. Мөн арванхоёрдугаар сард нийлүүлэх алтны фьючерсийн ханш 2.2 хувиар нэмэгдэж, 4,026.90 ам.доллар болсон байна.

АНУ-ын арваннэгдүгээр сарын 3-ны завсрын сонгуульд Ардчилсан нам Төлөөлөгчдийн танхим болон Сенатад олонх болох нь тодорхой болж, Ерөнхийлөгч Дональд Трампын Бүгд найрамдах нам томоохон ялагдал хүлээжээ. Сонгуулийн үр дүн нь төсвийн зарцуулалт, татварын бодлого болон Ираны дайны санхүүжилттэй холбоотой шийдвэрүүдэд Конгрессын тавих хяналтыг нэмэгдүүлэхээр байна.

Ам.долларын сулрал алтны ханшид голлон нөлөөлжээ Сонгуулийн үр дүн тодрох үеэр АНУ-ын хувьцааны фьючерс буурч, төрийн бондын үнэ өссөнөөр өгөөж нь багасав. Ам.долларын ханш мөн суларсан нь алтыг бусад валютаар худалдан авагчдад харьцангуй хямд болгож, эрэлтийг дэмжсэн байна.

“Pepperstone” компанийн судалгааны албаны дарга Крис Уэстоны тайлбарласнаар ам.долларын сулрал болон АНУ-ын төрийн бондын нэрлэсэн, бодит өгөөжийн огцом бууралт алтны ханшийг дэмжиж байна. Тэрбээр Трампын засаг захиргааны цаашдын бодлого илүү таамаглахад хүндрэлтэй болж болзошгүй гэсэн болгоомжлол ч алт худалдан авах сонирхлыг нэмэгдүүлж байгааг онцолжээ.