Улаанбаатарын авто зогсоолын төлбөрийг бүсчлэлээр ялгаатай тогтоох санал хэлэлцлээ

Нийслэлийн авто зогсоолын төлбөрийг байршил, бүсчлэлээр ялгаатай тогтоох асуудлыг зогсоолын хүртээмж, ашиглалт, менежментийг сайжруулах ажлын хэсгийн арваннэгдүгээр сарын 4-ний хуралдаанаар хэлэлцжээ. Тарифын зохицуулалтыг иргэдийн санал, хэрэгцээг судлахыг ажлын хэсэгт үүрэг болгосны дагуу боловсруулжээ.

Нийслэлийн Замын хөгжлийн төсөл, хөтөлбөрийн зохицуулагч Л.Хосбаяр төрийн, хувийн хэвшлийн болон холимог эзэмшлийн бүх авто зогсоолыг дахин тоолж, нэгдсэн бүртгэл үүсгэх шаардлагатайг онцолсон байна. Мөн зогсоолын ашиглалт, эзэмшилтэй холбоотой гэрээ, хэлцэл болон тэдгээрийн хэрэгжилтийг шалгаж судлах санал гаргав.

Хуралдаанаар нийтийн эзэмшлийн зогсоолын төлбөр хураах журам, эрх зүйн зохицуулалтыг боловсронгуй болгох, зогсоолын төлөвлөлт, тэмдэг, тэмдэглэгээний стандартыг шинэчлэх асуудлыг мөн авч үзсэн байна.

Ухаалаг системээр зогсоолын мэдээлэл, төлбөрийг нэгтгэнэ

Бүсчлэлээр ялгаатай төлбөр тогтоох чиглэл “Дэлхийн банк”-ны “Улаанбаатар хотын тогтвортой авто зам, тээвэр” төслийн баримтад туссан. Тус төслийн ухаалаг зогсоолын бүрэлдэхүүн хэсэгт тоног төхөөрөмж худалдан авах, программ хангамж хөгжүүлэх, ялгаатай тарифтай бүсчилсэн зогсоолын тогтолцоо нэвтрүүлэхээр төлөвлөсөн байна.

Төслийг хэрэгжүүлэгчийн 2025 оны есдүгээр сарын 12-ны тендерийн зард төрийн болон хувийн зогсоолын мэдээлэл, төлбөр тооцоо, хяналтын системийг нэгтгэхээр заасан байдаг. Эхний шатанд зам дагуух хоёр, замаас тусдаа талбай дахь нэг буюу нийт гурван байршилд системийг туршиж, цаашид хотын хэмжээнд өргөжүүлэх бэлтгэл хангахаар тусгасан байна.