Баруун эх үүсвэрээс хоногт 14 мянган шоо метр ус нийлүүлж эхэллээ

АНУ-ын Мянганы сорилтын корпорацын буцалтгүй тусламжаар хэрэгжүүлсэн нийслэлийн усан хангамжийн баруун эх үүсвэрийг төвлөрсөн сүлжээнд холбож, ус нийлүүлж эхэлжээ.

Өчигдөр өглөө Улаанбаатар хотын баруун эх үүсвэрээс ус дамжуулах 700-1,000 мм-ийн голчтой, есөн километр урт шугамыг нийслэлийн усан хангамжийн төвлөрсөн системд холбосон байна. Ингэснээр шинэ эх үүсвэрээс эхний ээлжид хоногт 14 мянган шоо метр ус нийлүүлж эхлэв.

Ус сувгийн удирдах газрын дарга Ц.Төрхүүгийн өгүүлснээр энэхүү бүтээн байгуулалт нь нийслэлийн усан хангамжийн хүчин чадлыг нэмэгдүүлж, ирээдүйн усны хомсдолын эрсдэлийг бууруулах ач холбогдолтой аж.

Ийнхүү нийслэлийн ус нийлүүлэх хүчин чадал хоногт 350-360 мянган шоо метрт хүрэх боломж бүрджээ.

Нийслэлийн оршин суугчид хоногт дунджаар 190-210 мянган шоо метр ус хэрэглэдэг бол энэхүү бүтээн байгуулалтын үр дүнд одоогийн усны хэрэглээ хоногийн дунджаас 140-170 мянган шоо метрээр илүү болж байна.

Улаанбаатар хот өмнөх тооцооллоор 2028 он гэхэд усны хомсдолд орох эрсдэлтэй гэсэн таамаг гарч байсан бол баруун эх үүсвэр ашиглалтад орсноор уг эрсдэлийг 2050-2055 он хүртэл хойшлуулах боломж бүрдэж байгаа аж. Усан хангамждаа газрын гүний усыг голлон ашигладаг нийслэл цаашид гадаргын усны хэрэглээг нэмэгдүүлэхээр төлөвлөжээ.

Туул усан сан цогцолборын ТЭЗҮ-ийг боловсруулжээ

Нийслэлийн усан хангамжийг урт хугацаанд тогтвортой байлгах зорилгоор Туул усан сан цогцолборын техник, эдийн засгийн үндэслэлийг боловсруулж, Нийслэлийн Засаг даргын Тамгын газар болон Хот байгуулалт, барилга, орон сууцжуулалтын яаманд хүлээлгэн өгсөн байна.

Тус төслийн хүрээнд Улаанбаатар хотын усан хангамжид гадаргын усыг ашиглах инженерийн болон дэд бүтцийн шийдлүүдийг төлөвлөжээ.