Өвлийн элсэлтийн шалгалтын бүртгэл энэ сарын 23-нд дуусна
Шалгалтын нэг хичээлийн бүртгэлийн хураамж 20 мянган төгрөг бөгөөд шалгуулагчид хоёроос дээш хичээл сонгох шаардлагатай.
Аравдугаар сарын 1-ний 09:00 цагт эхэлсэн өвлийн монгол хэл бичгийн болон элсэлтийн шалгалтын бүртгэл энэ сарын 23-ны 18:00 цагт дуусах тул шалгуулагчид www.eyesh.eec.mn цахим хуудсаар бүртгүүлэх боломжтой. Боловсролын үнэлгээний төвөөс өөрийн и-мэйл хаягийг ашиглах, шаардлага хангасан цээж зураг оруулах, элсэлтийн шалгалтын хичээлүүдээс хоёроос дээш хичээл сонгож, хураамжаа хугацаанд нь төлөхийг анхааруулав.
Шалгуулагчид хоёроос дээш хичээл сонгон бүртгүүлнэ Өвлийн шалгалтад бүртгүүлэгчид англи хэл, орос хэл, математик, физик, хими, биологи, газар зүй, түүх, нийгэм судлал гэсэн хичээлүүдээс хоёроос дээш хичээл сонгох шаардлагатай.
Харин Монгол хэл бичгийн болон элсэлтийн шалгалтын нэг хичээлийн бүртгэлийн хураамж 20 мянган төгрөг байх юм.
Шалгуулагчид бүртгэлийн хугацаанд шалгалт өгөх хичээлүүдээ сонгож, хураамжаа бүрэн төлсөн байх ёстой тул хураамж төлөгдөөгүй тохиолдолд бүртгэл баталгаажихгүйг анхааруулжээ.
Хөгжлийн онцлогтой шалгуулагчид бүртгүүлсний дараа шаардлагатай өргөдөл, эмчийн магадалгаа зэрэг холбогдох бичиг баримтаа бүртгэлийн хугацаанд Боловсролын үнэлгээний төвд ирүүлэх аж.
Өвлийн шалгалтад хэн хамрагдах вэ?
2026 оны өвлийн монгол хэл бичгийн болон элсэлтийн шалгалтад энэ онд болон түүнээс өмнө бүрэн дунд боловсрол, эсвэл түүнээс дээш түвшний боловсрол эзэмшсэн иргэд хамрагдана.
Иймээс өмнөх жилүүдэд ерөнхий боловсролын сургуулиа төгссөн, элсэлтийн шалгалтаа дахин өгөх эсвэл оноогоо ахиулах хүсэлтэй иргэд ч бүртгүүлэх боломжтой.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ
