Гэр хорооллын өрхүүдийн цахилгааны шөнийн тарифын хөнгөлөлт хэрэгжиж эхэллээ

Агаарын бохирдлыг бууруулах, гэр хорооллын өрхүүдийн цахилгаан халаалтын хэрэглээг дэмжих зорилгоор хэрэгжүүлдэг цахилгааны шөнийн тарифын хөнгөлөлт арваннэгдүгээр сарын 1-нээс үйлчилж эхэллээ.

УБЦТС ТӨХК-ийн мэдээлснээр Улаанбаатар хот, аймгийн төв болон арван мянгаас дээш хүн амтай сум, суурин газрын 220В, 380В-ын цахилгаан сүлжээнд холбогдсон, цахилгааны төлбөрийн үлдэгдэлгүй гэр хорооллын айл өрхүүд хөнгөлөлтөд хамрагдана. Оройн 21:00 цагаас дараа өдрийн өглөөний 09:00 цагийн хооронд хэрэглэсэн 1,500 кВт.цаг хүртэлх цахилгаанд хөнгөлөлт тооцох бөгөөд уг хэмжээнээс давсан хэрэглээнд үйлчлэхгүй. Энэ өвлийн хөнгөлөлт 2027 оны гуравдугаар сарын 31 хүртэл үргэлжилнэ.

Гэр хорооллын өрхүүдэд цахилгааны үнийн урамшуулал олгох зохицуулалтыг 2011 онд баталж байсан бол 2016 оны арваннэгдүгээр сараас хоёр тарифт тоолууртай өрхүүдийн шөнийн хэрэглээнд 50 хувийн хөнгөлөлт тооцож байжээ. Улмаар 2017 оны нэгдүгээр сарын 1-нээс нийслэлийн гэр хорооллын өрхүүдийн шөнийн тарифыг 100 хувь хөнгөлж эхэлсэн байна.

Цахилгаан халаалтын хэрэглээг дэмжихийн зэрэгцээ эрчим хүчний системийн шөнийн бага ачааллын үеийн хэрэглээг нэмэгдүүлэхэд чиглэсэн энэ бодлогын хүрээнд анх 21:00–06:00 цагийн хэрэглээнд хөнгөлөлт үзүүлж байв. Харин 2025 онд журамд өөрчлөлт оруулснаар өглөөний 09:00 цаг хүртэл буюу хоногийн 12 цагийн хэрэглээг хамруулах болсон юм.

Хөнгөлөлт эдлэх өрхүүд стандартын шаардлага хангасан, баталгаажсан тарифт электрон тоолууртай байхаас гадна цахилгааны болон галын аюулгүй байдлыг хангасан байх шаардлагатайг мөн журамд тусгажээ.